Trump na Kim biteganyijwe ko batangira inama yabo y'i Vietnam basangira ifunguro rya nijoro

Bwana Trump na Bwana Kim banditse amateka mu kwezi kwa gatandatu k'umwaka ushize wa 2018 ubwo babaga abategetsi ba mbere b'ibihugu byombi bakoranye inama bakiri ku butegetsi Uwufise ububasha kw’isanamu Getty Images
Image caption Bwana Trump na Bwana Kim banditse amateka mu kwezi kwa gatandatu k'umwaka ushize wa 2018 ubwo babaga abategetsi ba mbere b'ibihugu byombi bakoranye inama bakiri ku butegetsi

Perezida Donald Trump wa Leta Zunze Ubumwe z'Amerika n'umutegetsi mukuru wa Koreya ya ruguru, Kim Jong-un, biteganyijwe ko batangira inama yabo kuri uyu wa gatatu bagirana ibiganiro bigufi, biza gukurikirwa no gusangira ifunguro rya nijoro.

Muri iyi nama y'iminsi ibiri ibera mu murwa mukuru Hanoi wa Vietnam, byitezwe ko baganira ku gishushanyo mbonera cyuko Koreya ya ruguru yareka gahunda yayo yo gucura ibitwaro kirimbuzi bya nikleyeri.

Mbere yuko ahura na Bwana Kim, Bwana Trump araza kugirana inama na minisitiri w'intebe wa Vietnam n'abandi banyapolitike.

Biteganyijwe ko Bwana Trump na Bwana Kim baza gusangirira ifunguro rya nijoro muri hoteli y'inyenyeri eshanu yitwa Metropole hotel ya hano muri Vietnam.

Mu butumwa yatangaje ku rubuga nkoranyambaga rwa Twitter mu gitondo cyo kuri uyu wa gatatu, Bwana Trump yashimagije iki gihugu cya Vietnam kigiye kuberamo iyi nama, agira ati:

"Vietnam iri mu bihugu bicye ku isi biri gutera imbere cyane. Koreya ya ruguru nayo ni ko byayigendekera, kandi mu buryo bwihuse cyane, yemeye kureka ibitwaro kirimbuzi bwa nikleyeri".

Yongeyeho ati: "Ifite amahirwe MENSHI yo kubigeraho".

Ingengabihe y'inama yabo iteye gute?

Nkuko bitangazwa n'ibiro bya White House bya Bwana Trump, mu guhura kwabo kwa mbere muri Vietnam, byitezwe ko baganira mu gihe cy'iminota 20 ku isaha ya saa kumi n'ebyiri n'iminota 40 z'umugoroba ku isaha yo muri Vietnam.

Nuko ikurikirwe n'ifunguro rya nijoro baza gusangira bari kumwe na bamwe mu bategetsi babaherecyeje.

Uwufise ububasha kw’isanamu Getty Images

Ku wa kane, aba bategetsi bombi bazitabira inama zitandukanye bari hamwe, ariko ntibizwi neza uko gahunda yabo izaba imeze kuri uwo munsi.

Byitezwe ko gahunda ikomeye iyo ari yo yose - nko gushyira umukono ku masezerano cyangwa ibiganiro n'abanyamakuru - iba ku wa kane.

Kuki bongeye guhura?

Byitezwe ko iyi nama yo mu murwa mukuru Hanoi ikomereza aho bagereje mu nama yabo ya mbere yo mu kwezi kwa gatandatu k'umwaka ushize wa 2018 yabereye muri Singapour.

Icyo gihe, Bwana Trump na Bwana Kim banditse amateka baba abategetsi ba mbere b'ibihugu byombi bakoranye inama bakiri ku butegetsi.

Uwufise ububasha kw’isanamu Getty Images
Image caption Nta kintu gifatika cyari bwagerweho nyuma y'inama y'amateka y'aba bategetsi bombi yo mu mwaka ushize wa 2018

Muri iyo nama, aba bategetsi bashyize umukono ku masezerano atarasa ku ntego neza, bemeranya "gukora hagamijwe guca ibitwaro kirimbuzi bya nikleyeri" - nubwo hatigeze hasobanurwa uko bizakorwa.

Kuki ibereye muri Vietnam?

Ni ahantu hababereye bombi ku mpamvu nyinshi. Vietnam ifitanye umubano ushingiye kuri ambasade n'Amerika na Koreya ya ruguru, nubwo Vietnam n'Amerika byigeze kuba ibihugu by'abanzi.

Vietnam rero ishobora kwifashishwa n'Amerika nk'urugero rw'ibihugu bibiri - Vietnam n'Amerika - biri gusenyera umugozi umwe byiyibagiza ibihe bya kera byaranzwe n'amakimbirane hagati yabyo.

Uwufise ububasha kw’isanamu Reuters
Image caption Bwana Trump azunguza ibendera rya Vietnam mu nama yagiranye na Nguyen Xuan Phuc, minisitiri w'intebe wa Vietnam