Ubutaliyani bwashyizeho itegeko ribuza abana badakingiye kujya ku ishuri

Itegeko rishya ritegeka ko hatangwa inkingo 10 - kandi ntirivugwaho rumwe Uwufise ububasha kw’isanamu Getty Images
Image caption Itegeko rishya ritegeka ko hatangwa inkingo 10 - kandi ntirivugwaho rumwe

Abana bo mu Butaliyani basabwe kutongera kujya ku ishuri cyeretse bagaragaje icyemezo cyuko bakingiwe neza.

Iki cyemezo gifashwe nyuma y'amezi yari ashize muri iki gihugu hagibwa impaka ku kuba gukingirwa byagirwa itegeko.

Ababyeyi bafite ibyago byo kuba bacibwa amande angana n'amadolari 560 y'Amerika mu gihe baba bohereje abana babo ku ishuri batarakingiwe. Abana batagejeje ku myaka itandatu y'amavuko bashobora koherezwa iwabo.

Iri tegeko rishya rishyizweho mu gihe hari ukwiyongera cyane kw'indwara y'iseru, ariko abategetsi bo mu Butaliyani bavuga ko imibare y'abakingirwa imaze kwiyongera kuva iri tegeko ryatangira gukurikizwa.

Bijyanye n'iri tegeko ryiswe Lorenzin - ryitiriwe uwahoze ari minisitiri w'ubuzima w'iki gihugu waritangije, abana bagomba guhabwa inkingo zitandukanye mu buryo bw'itegeko mbere yuko batangira ishuri. Zirimo nk'urukingo rwa mugiga, iseru, n'ibihara.

Iri tegeko kandi ritegeka ko abana bafite kugeza ku myaka itandatu y'amavuko, birukanwa mu mashuri y'incuke mu gihe nta cyemezo bagaragaje cyuko bakingiwe.

'Utarakingiwe, nta kujya ku ishuri'

Abafite hagati y'imyaka itandatu na 16 ntabwo bashobora kubuzwa kujya ku ishuri, ariko ababyeyi babo bashobora gucibwa amande mu gihe abo bana batahetuye inkingo 10 zose ziteganywa n'iri tegeko.

Igihe cyari cyatanzwe cyo kuba abana bose biga baba bahawe inkingo cyari ku itariki ya 10 y'uku kwezi kwa gatatu - nyuma y'itinda ryabayeho mbere yaho, ariko kubera ko iyo tariki yahuriranye n'impera y'icyumweru, icyo gihe kimuriwe ku wa mbere w'iki cyumweru.

Giulia Grillo, minisitiri w'ubuzima w'Ubutaliyani, yabwiye ikinyamakuru La Repubblica cyo muri iki gihugu ati: "Ubu noneho buri wese utari yarikingije mbere yabonye umwanya wo kubikora".

Amakuru avuga yahanganye n'igitutu yotswaga na Matteo Salvini, minisitiri w'intebe wungirije w'Ubutaliyani, washakaga ko iyo tariki yongera kuba yigijwe imbere.

Madamu Grillo yavuze ko ubu noneho ibintu bisobanutse neza: "Utarakingiwe, nta kujya ku ishuri".

Ibitangazamakuru byo mu Butaliyani bitangaza ko abategetsi bo mu turere tw'iki gihugu barikubyitwaramo mu buryo butandukanye.

Nk'i Bologna mu majyaruguru y'iki gihugu, umutegetsi wo mu nzego z'ibanze yoherereje amabaruwa ababyeyi b'abana 300 yo guhagarika abana babo ku masomo, kandi abana 5000 nta byemezo bafite byuko bahawe inkingo zose.

Mu tundi turere ho nta baratangazwa ko bahagaritswe ku masomo, mu gihe mu tundi turere ho hatanzwe igihe cy'iminsi micye yo kubihanganira irenga ku gihe ntarengwa cyo ku wa mbere w'iki cyumweru cyari cyatanzwe.

Ni iyihe ngaruka iri tegeko riri kugira?

Iri tegeko ryashyizeho abategetsi b'Ubutaliyani bavuga ko bashaka kongera ikigero cy'abakingirwa cyagaragazaga kugabanuka cyane kijya munsi ya 80 ku ijana (80%), mu gihe ishami ry'umuryango w'abibumbye ryita ku buzima (OMS) risaba ko inkingo zitangwa ku kigero cya 95 ku ijana (95%).

Ku wa mbere w'iki cyumweru - wari umunsi wa nyuma ababyeyi bari bafite wo kugaragaza ko abana babo bakingiwe neza - minisiteri y'ubuzima muri iki gihugu yatangaje imibare ivuga ko ikigero cy'ikingira kigeze cyangwa kiri hafi ya 95% ku bana bose bavutse mu mwaka wa 2015, bitewe n'urukingo runaka ruri kuvugwaho.

Ikigero cya 95% giteganywa na OMS, ni igihe abaturage bahagije baba bamaze gukingirwa kuburyo biba bigoye ko indwara yakwirakwira, bityo bikarinda n'abaturage baba badashobora gukingirwa.

Uwufise ububasha kw’isanamu Getty Images
Image caption Mu mwaka wa 2017, i Roma habereye imyigaragambyo yo kwamagana gukingirwa by'itegeko

Abo baba badashobora gukingirwa barimo nk'abana baba bakiri bato cyane byo kuba bahabwa urukingo, cyangwa aba bafite ubwirinzi bw'umubiri bufite ikibazo budashobora guhangana n'indwara zandura na kanseri.

Mu kwezi gushize kwa kabiri, umwana w'imyaka umunani y'amavuko wari urimo kugenda yoroherwa indwara ya kanseri, yananiwe kujya ku ishuri mu murwa mukuru Roma w'Ubutaliyani bitewe no gucika intege k'ubwirinzi bwe bw'umubiri.

Uwo mwana yari amaze amezi avurwa indwara ya kanseri yo mu maraso (leukaemia), ariko yari afite ibyago byo kwandura kubera ko hari bamwe mu banyeshuri bo ku ishuri yigaho batari barakingiwe - harimo na benshi bo mu cyumba cy'ishuri yigamo.

Ibindi bisa n’ibi