Umukuru wa kompanyi ya Ethiopian Airlines asaba ko indege zose za Boeing 737 Max 8 zihagarikwa

Abakora iperereza ku cyateye impanuka y'indege ya kompanyi Ethiopian Airlines bagenzura ibisigazwa byayo Uwufise ububasha kw’isanamu Getty Images
Image caption Abakora iperereza ku cyateye impanuka y'indege ya kompanyi Ethiopian Airlines bagenzura ibisigazwa byayo

Umukuru wa kompanyi y'indege ya Ethiopian Airlines yasabye ko indege zose zo mu bwoko bwa Boeing 737 Max 8 zihagarikwa kugeza igihe bizagaragarira neza ko zitekanye kuzigendamo.

Ibihugu byinshi byamaze guhagarika ingendo z'indege zo muri ubu bwoko nyuma yaho imwe mu ndege za Ethiopian Airlines ikoreye impanuka ku cyumweru gishize imaze iminota itandatu ihagurutse ku kibuga cy'indege cyo ku murwa mukuru Addis-Abeba wa Ethiopia yerekeza i Nairobi ku murwa mukuru wa Kenya.

Abantu 157 bose bari bayirimo bahasize ubuzima.

Tewolde Gebremariam yabwiye BBC ko nubwo impamvu nyirizina zateye iyo mpanuka zitaramenyekana, hari ugusa kugaragara hagati y'iyo mpanuka yo ku cyumweru n'iy'iyindi ndege yo muri ubu bwoko ya kompanyi Lion Air yo muri Indonesia yabaye mu kwezi kwa cumi k'umwaka ushize igahitana abantu 189.

Ariko abategetsi bo muri Leta Zunze Ubumwe z'Amerika - hari icyicaro gikuru cy'uruganda rukora indege zo muri ubu bwoko - bavuga ko izo ndege zitekanye kuzigendamo.

Ubuyobozi bw'ubwikorezi bwo mu ndege muri Amerika buvuga ko igenzura ryakozwe "nta bibazo by'imikorere" ryagaragaje, ko rero nta mpamvu ihari yo guhagarika indege zo muri ubwo bwoko.

Bwana Gebremariam yavuze ko yemera ko kompanyi ya Boeing n'ubuyobozi bw'ubwikorezi bwo mu ndege muri Amerika bagomba kuba bafite impamvu zituma bavuga ko Boeing 737 Max 8 ari indege ifite umutekano.

Ariko yavuze ko "kwitwararika cyane" gucyenewe kandi "twe twese twahagaritse iyi ndege [yo muri ubu bwoko] dufite impamvu zumvikana neza cyane".