ONU itangaza ko inkubi y'umuyaga Idai yateje 'amakuba akomeye' muri Mozambique na Zimbabwe

Abantu bagerageza kuramura bicye byasigaye mu nzu yasenywe n'inkubi y'umuyaga Idai muri Zimbabwe Uwufise ububasha kw’isanamu AFP
Image caption Abantu bagerageza kuramura bicye byasigaye mu nzu yasenywe n'inkubi y'umuyaga Idai muri Zimbabwe

Umuryango w'abibumbye utangaza ko inkubi y'umuyaga uvanze n'imvura wiswe Idai wateje "amakuba akomeye" abantu babarirwa mu bihumbi amagana - niba ahubwo atari ababarirwa muri za miliyoni - muri Afurika y'amajyepfo.

Aka karere kibasiwe n'imyuzure no kwangirika mu bihugu bya Mozambique, Zimbabwe na Malawi.

Perezida Filipe Nyusi wa Mozambique yavuze ko aya ari "amakuba yibasiye abantu yo ku rwego rwo hejuru".

Bwana Nyusi yavuze ko abantu barenga 1000 bashobora kuba barapfuye nyuma yaho uyu muyaga wibasiye iki gihugu mu cyumweru gishize.

Inkubi y'umuyaga Idai yatangiye ku wa kane w'icyumweru gishize hafi y'umujyi wa Beira uri ku cyambu mu ntara ya Sofala, ufite umuvuduko wa kilometero 177 ku isaha.

Uwufise ububasha kw’isanamu EPA
Image caption Ifoto ifatiwe mu kirere igaragaza ibyangiritse mu mujyi wa Beira muri Mozambique

Ku munsi w'ejo ku wa kabiri, Clare Nullis, wo mu kigo cya ONU cyita ku mihindagurikire y'ikirere, yabwiye BBC ati: "Bisa nkaho aya agiye kuba amakuba ya mbere mabi cyane ashingiye ku mihindagurikire y'ikirere yibasiye igice cy'amajyepfo y'isi".

Naho Christian Lindmeier ukora mu ishami rya ONU ryita ku buzima we yagize ati: "Ducyeneye ubufasha bwose bw'ibikoresho bushoboka".

Leta ya Mozambique itangaza ko abantu 200 ari bo bamaze kumenyekana ko bahitanywe n'uyu muyaga, mu gihe abandi ibihumbi 100 bacyeneye ubutabazi bw'ihutirwa hafi y'umujyi wa Beira.

Uwufise ububasha kw’isanamu AFP
Image caption Abakozi ba kompanyi ibaza imbahu baheze mu gihirahiro nyuma yaho umuhanda wangirikiye mu mujyi wa Chimanimani mu burasirazuba bwa Zimbabwe

Umunyamakuru wa BBC Jose Tembe uri muri Mozambique avuga ko guverineri Manuel Rodrigues w'intara bituranye ya Manica avuga ko hacyenewe ubutabazi bw'ihutirwa bwo kurokora abantu bakirenzweho n'ibyasenywe n'uyu muyaga.

Lola Castro, ukuriye ishami rya ONU ritanga imfashanyo y'ibiribwa rya PAM mu karere k'Afurika y'amajyepfo, avuga ko amazi y'imyuzure afite uburebure bwa metero esheshatu "yangije bikomeye cyane" igice kinini cya Mozambique.

ONU itangaza ko abantu miliyoni imwe n'ibihumbi 700 bashobora kwibasirwa n'uyu muyaga muri Mozambique kandi ko abandi ibihumbi 920 wabagizeho ingaruka muri Malawi.

Leta ya Zimbabwe itangaza ko abantu 98 bapfuye naho abarenga 200 bakaba baraburiwe irengero.

Hagati aho, ibikorwa by'ubutabazi bya leta z'ibi bihugu n'imiryango mpuzamahanga ifasha birakomeje, ariko bikaba biri gukomwa mu nkokora n'ikibazo cy'imihanda itakiri nyabagendwa ndetse n'indege zibangamirwa n'ibihe by'ikirere bitameze neza.