Abatabazi bari gusiganwa n'igihe mu kugera ku 'bantu 15000 bagicyeneye kurokorwa' inkubi y'umuyaga Idai

Abantu bagizweho ingaruka n'uyu muyaga bafata imfashanyo y'umuceri bayikura mu bubiko bwashyizwe mu mujyi wa Beira Uwufise ububasha kw’isanamu AFP
Image caption Abantu bagizweho ingaruka n'uyu muyaga bafata imfashanyo y'umuceri bayikura mu bubiko bwashyizwe mu mujyi wa Beira

Abategetsi ba Mozambique bavuga ko abantu bagera ku bihumbi 15 bagicyeneye kurokorwa byihuse nyuma yo kwibasirwa n'inkubi y'umuyaga Idai yibasiye igice cy'Afurika y'amajyepfo.

Bavuga ko abo bari mu gihirahiro kubera imyuzure, bakaba bitendetse ku bisenge by'inzu cyangwa bari mu biti buriye.

Mu mujyi wa Beira uri ku cyambu muri Mozambique, abakora mu bikorwa byo gutanga imfashanyo bavuga ko bafite igihe cy'iminsi hagati y'ibiri n'itatu gusa yo gukuraho amazi asigaye.

Abantu 300 bamaze kwemezwa ko ari bo bapfuye muri Mozambique no muri Zimbabwe, ariko byitezwe ko uyu mubare wiyongera.

Imiryango y'ubuvuzi ivuga ko mu gihe ibiribwa n'amazi meza yo kunywa bikomeje kubura, hari ibyago byinshi byuko haduka indwara.

Uwufise ububasha kw’isanamu AFP
Image caption Amazi y'imigezi yarenze inkombe ateza imyuzure mu bice byinshi by'umujyi wa Beira

Uyu muyaga ufite imbaraga zidasanzwe wakumunzuye abantu n'ibintu mu mujyi wa Beira ku wa kane w'icyumweru gishize, ugendera ku muvuduko urenga kilometero 177 ku isaha.

Nuko usiga wangije byinshi ukomereza muri Zimbabwe na Malawi.

Get Verdonck, uhuza ibikorwa by'ubutabazi bwihuse mu muryango w'abaganga batagira umupaka Médecins Sans Frontières, yagize ati: "Ikintu cya mbere ubona iyo uhageze ni ibyangiritse ndetse n'amazi menshi".