Koreya ya ruguru yikuye mu biro by'i Kaesong biyihuza na Koreya y'epfo

Ibi biro byatashywe mu byishimo byinshi mu kwezi kwa cyenda k'umwaka ushize wa 2018 Uwufise ububasha kw’isanamu Reuters
Image caption Ibi biro byatashywe mu byishimo byinshi mu kwezi kwa cyenda k'umwaka ushize wa 2018

Koreya ya ruguru yikuye mu biro biyihuza na Koreya y'epfo byafunguwe mu mwaka ushize wa 2018 ngo byoroshye ibiganiro ubwo byasaga nkaho umubano wa Koreya zombi wongeye kuzahuka.

Koreya y'epfo ivuga ko kuri uyu wa gatanu ari bwo yamenyeshejwe ko abakozi ba Koreya ya ruguru bakoreraga muri ibyo biro baza kubivamo uyu munsi.

Koreya y'epfo ivuga ko ibabajwe n'icyo cyemezo ndetse ikaba iri kwingingira abakozi ba Koreya ya ruguru kuzagaruka vuba bishoboka.

Abategetsi ba Koreya zombi ntibarahura kuva mu kwezi gushize kwa kabiri ubwo habaga inama itaragize icyo igeraho yahuje Perezida Donald Trump wa Leta Zunze Ubumwe z'Amerika na Kim Jong-un, umutegetsi wa Koreya ya ruguru.

Ibyo biro by'ubuhuza, biri mu mujyi wa Kaesong wo muri Koreya ya ruguru uri ku mupaka na Koreya y'epfo, byari bisanzwe bifasha abategetsi b'ibihugu byombi kugirana ibiganiro mu buryo buhoraho ku nshuro ya mbere kuva haba intambara yahuje Koreya zombi mu myaka ya 1950.

Uwufise ububasha kw’isanamu Reuters
Image caption Kim Jong-un, umutegetsi wa Koreya ya ruguru, mu nama yamuhuje na Nguyen Xuan Phuc (utagaragara ku ifoto), minisitiri w'intebe wa Vietnam, mu murwa mukuru Hanoi w'iki gihugu ku itariki ya mbere y'uku kwezi kwa gatatu

Bivugwa ko ibyo biro bikorerwamo n'abakozi 20 kuri buri ruhande.

Umunyamakuru wa BBC Laura Bicker uri i Séoul mu murwa mukuru wa Koreya y'epfo, avuga ko Perezida Moon Jae-in wa Koreya y'epfo yari yarizeye ko umubano we na Bwana Kim wari warateye imbere bihagije kuburyo utahungabanywa n'ibibazo Koreya ya ruguru yaba ifitanye n'Amerika.

Uyu munyamakuru avuga ko bisa nkaho kuri Koreya ya ruguru yo atari uko byari bimeze.

Koreya y'epfo yari ifite icyizere cyo kuba umuhuza hagati ya Bwana Trump na Bwana Kim.

Uyu munyamakuru wa BBC uri i Séoul akaba avuga ko rero kuba kuri ubu Koreya ya ruguru itanashaka ko abakozi bayo bakorera mu biro bimwe n'aba Koreya y'epfo, bisa nkaho umwuka utari shyashya.