Abigaragambya babarirwa mu bihumbi amagana basabye Perezida Bouteflika wa Algeria kwegura

Amagereranya amwe avuga ko abantu bagera kuri miliyoni bitabiriye imyigarambyo mu murwa mukuru Alger wa Algeria Uwufise ububasha kw’isanamu Getty Images
Image caption Amagereranya amwe avuga ko abantu bagera kuri miliyoni bitabiriye imyigarambyo mu murwa mukuru Alger wa Algeria

Abigaragambya babarirwa mu bihumbi amagana ku wa gatanu bigabije imihanda mu bice bitandukanye bya Algeria basaba ko Perezida Abdelaziz Bouteflika yegura.

Amagereranya amwe avuga ko abantu bagera kuri miliyoni bitabiriye imyigarambyo mu murwa mukuru Alger wa Algeria.

Ubaye umunsi wo ku wa gatanu wo ku nshuro ya gatandatu yikurikiranya w'imyigaragambyo mu bice bitanduaknye by'iki gihugu yo kwamagana Bwana Bouteflika.

Mu ntangiriro y'iki cyumweru, Liyetona Jenerali Ahmed Gaed Salah, umukuru w'igisirikare cya Algeria, yasabye ko Perezida Bouteflika yegura.

Ariko amashyaka atavuga rumwe n'ubutegetsi muri Algeria yavuze ko ibyo bitizeza ko amatora azabamo ubwisanzure.

Umunyamakuru wa BBC Mohamed Arezki Himeur uri mu murwa mukuru Alger avuga ko polisi yarashe imyuka iryana mu maso mu gutatanya abigaragambya bageragezaga kugera ku biro bya perezida.

Uwufise ububasha kw’isanamu AFP
Image caption Perezida Bouteflika w'imyaka 82 y'amavuko, ari ku butegetsi guhera mu mwaka wa 1999

Uku kongera gusaba ko ubutegetsi buhinduka muri Algeria kubaye hashize iminsi gusa Liyetona Jenerali Ahmed Gaed Salah asabye ko Bwana Bouteflika atangazwa ko atagishoboye gutegeka iki gihugu.

Uwufise ububasha kw’isanamu EPA
Image caption Polisi yarashe imyuka iryana mu maso mu gutatanya abigaragambya bageragezaga kugera ku biro bya perezida

Imyigaragambyo yo kwamagana Bwana Bouteflika yatangiye mu kwezi gushize kwa kabiri nyuma yaho uyu perezida usigaye uboneka gacye cyane mu ruhame kuva yarwara indwara y'imitsi yo mu bwonko mu mwaka wa 2013, atangarije ko aziyayamariza indi manda.

Iyi myigaragambyo yatumye nyuma aza gutangaza ko atakiyamamaje kuri manda ya gatanu mu matora yirimije, kuri ubu yabaye asubitswe.

Ariko ibyo ntibyanyuze abigaragambya, bavuga ko ari amayeri ya Bwana Bouteflika yo kugerageza kuguma ku butegetsi amazeho imyaka 20.

Ibindi bisa n’ibi