Papa Francis yasabye abaturage ba Maroc kurwanya ubuhezanguni

Papa Francis (ibumoso) yasanganiwe n'Umwami Mohammed VI (iburyo) wa Maroc Uwufise ububasha kw’isanamu Reuters
Image caption Papa Francis (ibumoso) yasanganiwe n'Umwami Mohammed VI (iburyo) wa Maroc

Papa Francis yasabye abaturage ba Maroc kurwanya ibitekerezo bikaze by'ubuhezanguni, mu ruzinduko yagiriye muri iki gihugu rugamije gutsura umubano hagati y'amadini.

Ubwo yageraga muri Maroc ku munsi w'ejo ku wa gatandatu, yasanganiwe ku kibuga cy'indege n'Umwami Mohammed VI w'iki gihugu, nuko atwarwa mu modoka yerekeza mu murwa mukuru Rabat aho yagejeje ijambo ku mbaga.

Biteganyijwe ko muri iyi mpera y'icyumweru ahura n'abimukira n'abakuru bo mu idini ya kisilamu, ndetse agasomera misa abakristu gatolika mbarwa baba muri iki gihugu.

Ibiro bya Vaticani bya Papa bifata uru ruzinduko nk'urukomerezaho ku ruzinduko rwanditse amateka yagiriye mu Leta Zunze Ubumwe z'Abarabu (United Arab Emirates) mu kwezi gushize kwa kabiri.

Idini rya kisilamu ni ryo dini rya leta muri Maroc.

Papa Francis yabwiye imbaga y'abantu babarirwa mu bihumbi ko ari "ingenzi kurwanya ubuhezanguni" kandi ko abemera "bakwiye kubaho nk'abavandimwe".

Yashyigikiye "uburenganzira bwo guhitamo idini" umuntu ashaka nk'uburenganzira bw'ibanze bw'ikiremwa-muntu, avuga ko "bicyenewe" ko "hategurwa mu buryo bukwiye abayobozi b'amadini bazayobora abemera mu gihe kiri imbere".

Kuva mu mwaka wa 2015, bigereranywa ko urubyiruko rwo muri Maroc rugera ku 1600 rwacengejwemo amahame y'ubuhezanguni rukajya mu barwanyi bagendera ku mahame akaze y'idini ya kisilamu bo mu mutwe wiyita leta ya kisilamu.

Umwami Mohammed VI yavuze ko urufunguzo rwo guhashya ubuhezanguni mu rubyiruko ari ukongera amahugurwa ku bijyanye n'amadini.

Uwufise ububasha kw’isanamu AFP/GETTY IMAGES
Image caption Biteganyijwe ko muri iyi mpera y'icyumweru Papa Francis (ibumoso) ahura n'abimukira n'abakuru bo mu idini ya kisilamu

Abategetsi ba Maroc bavuze ko Papa Francis ukuriye Kiliziya Gatolika ifite abayoboke bagera hafi kuri miliyari imwe na miliyoni 300 ku isi, yagiye muri Maroc ku butumire bw'umwami w'iki gihugu cyo mu majyaruguru y'Afurika, mu rwego rwo "gutsura umubano hagati y'amadini".

Amategeko ya Maroc ateganya ubwisanzure bw'amadini.

Ariko abakristu - bagize rimwe ku ijana (1%) ry'abaturage miliyoni 33 batuye muri iki gihugu nkuko bikubiye mu ibarura ryo mu mwaka wa 2014 - bavuga ko batemererwa gusenga ku mugaragaro kandi ko bakorerwa ivangura.

Bijyanye n'amategeko ahana yo muri Maroc, ushobora gufungwa ugerageje guhindura umuyisilamu ngo ajye mu idini rya gikristu.

Biteganyijwe kandi ko Papa Francis asura n'ishuri ry'abakuru mu idini ya kisilamu (aba-imam) ndetse n'ikigo cy'abimukira cy'umuryango ufasha wa Kiliziya Gatolika, muri iki gihe Uburayi n'amajyaruguru y'Afurika bikomeje guhangana n'ikibazo cy'abimukira.