Igisirikare cya Sudani kivuga ko cyahiritse ubutegetsi bwa Omar al-Bashir nyuma y'imyigaragambyo

Bwana Bashir w'imyaka 75 y'amavuko, yageze ku butegetsi mu mwaka wa 1989 binyuze mu ihirika ry'ubutegetsi (Coup d'État) ryakozwe n'abasirikare Uwufise ububasha kw’isanamu Reuters
Image caption Bwana Bashir w'imyaka 75 y'amavuko, yageze ku butegetsi mu mwaka wa 1989 binyuze mu ihirika ry'ubutegetsi (Coup d'État) ryakozwe n'abasirikare

Minisitiri w'ingabo wa Sudani yatangaje ko nyuma y'imyaka hafi 30 Perezida Omar al-Bashir ari ku butegetsi, ubu yahiritswe ndetse agatabwa muri yombi agashyirwa ahantu acungiwe umutekano.

Avugira kuri televiziyo y'igihugu, Ahmed Awad Ibn Ouf yavuze ko hagiye kubaho leta y'inzibacyuho izamara igihe cy'imyaka ibiri.

Yavuze ko igisirikare cyafashe icyemezo cyo kugenzura icyo gihe cy'inzibacyuho, kizakurikirwa n'amatora.

Yavuze kandi ko hagiyeho igihe cy'ibihe bidasanzwe cy'amezi atatu, itegekonshinga rihagaritswe, imipaka ifunzwe kugeza hongeye gutangwa irindi tangazo, kandi ko ikirere cya Sudani gifunzwe mu gihe cy'amasaha 24.

Ntibizwi aho Bwana Bashir ari kuri ubu.

Imyigaragambyo yo kwamagana Bwana Bashir w'imyaka 75 y'amavuko - wategetse Sudani guhera mu mwaka wa 1989 nyuma yo kugera ku butegetsi binyuze mu ihirika ry'ubutegetsi (Coup d'État) ryakozwe n'abasirikare - yari imaze amezi.

Uwufise ububasha kw’isanamu Reuters
Image caption Byari ibyishimo mu murwa mukuru Khartoum nyuma y'iryo tangazo ry'igisirikare cya Sudani

Yatangiye mu mpera y'umwaka ushize wa 2018 kubera izamuka ry'ibiciro by'ibicuruzwa by'ibanze nkenerwa mu buzima bw'abaturage, birimo nk'igiciro cy'umugati n'icy'ibikomoka kuri peteroli.

Mu mwaka wa 2009, Bwana Bashir yashyiriweho impapuro zo kumuta muri yombi n'urukiko mpuzamahanga mpanabyaha (ICC) ashinjwa ibyaha by'intambara n'ibyibasira inyoko-muntu mu ntara ya Darfour iri mu burengerazuba bw'iki gihugu.

Icyemezo cy'uru rukiko ariko nticyashyigikiwe n'umuryango w'ubumwe bw'Afurika, ihuriro ry'ibihugu by'Abarabu n'ibihugu nk'Uburusiya n'Ubushinwa - ibintu byatumye Bwana Bashir akomeza kwidegembya no kugenda mu bihugu binyuranye birimo Afurika y'epfo, u Rwanda na Uganda.

Ariko ntibizwi neza ikizamubaho nyuma yaho atawe muri yombi kuri uyu wa kane.

Ibindi bisa n’ibi