Perezida Sisi wa Misiri - uzarangiza manda muri 2022 - ashobora gutegeka kugera muri 2030

Abdel Fattah al-Sisi, ugaragara hano ku cyapa kiri ku muhanda, yongeye gutorwa mu mwaka ushize nyuma yo gutsinda amatora n'amajwi 97 ku ijana (97%) Uwufise ububasha kw’isanamu Reuters
Image caption Abdel Fattah al-Sisi, ugaragara hano ku cyapa kiri ku muhanda, yongeye gutorwa mu mwaka ushize nyuma yo gutsinda amatora n'amajwi 97 ku ijana (97%)

Inteko ishingamategeko ya Misiri yemeje impinduka mu itegekonshinga zishobora gutuma Perezida Abdel Fattah al-Sisi aguma ku butegetsi kugera mu mwaka wa 2030.

Biteganyijwe ko Bwana Sisi ava ku butegetsi mu mwaka wa 2022 ubwo manda ye ya kabiri y'imyaka ine izaba irangiye.

Ariko izo mpinduka, zigomba gufatwaho umwanzuro wa nyuma mu minsi 30 binyuze muri kamarampaka, zakongera iyi manda ye ya kabiri ikagera ku myaka itandatu, zigatuma yongera no kwiyamamariza indi manda.

Izo mpinduka kandi zaha Bwana Sisi w'imyaka 64 y'amavuko, ububasha buruseho ku rwego rw'ubucamanza ndetse zikarushaho gushimangira uruhare rw'igisirikare muri politiki y'iki gihugu.

Mohammed Abu Hamed, umwe mu badepite baharaniye ko izo mpinduka mu itegekonshinga zikorwa, yabwiye ibiro ntaramakuru AFP ko Bwana Sisi ari Perezida "wafashe ingamba z'ingenzi muri politiki, mu bukungu no mu mutekano", ko rero agomba kwemererwa "gukomeza amavugurura ye".

Ariko Khaled Dawoud wo mu ishyaka al-Dustour rivuga ko riharanira ukwishyira ukizana, avuga ko iyo ngingo ya Bwana Hamed "idafatika". Yabwiye BBC ko izo mpinduka ari "ugupapuza ubutegetsi" kwakozwe na Bwana Sisi.

Uwufise ububasha kw’isanamu AFP
Image caption Abashyigikiye Bwana Sisi bavuga ko izo mpinduka zicyenewe ngo abone igihe kirushijeho cyo kurangiza amavugurura

Mu mwaka wa 2013, Bwana Sisi yayoboye ihirikwa ku butegetsi ryakozwe n'igisirikare rya Mohammed Morsi, Perezida wa mbere wa Misiri watowe muri demokarasi, nyuma y'imyigaragambyo yamaganaga ubutegetsi bwe.

Kuva icyo gihe, yayoboye icyo imiryango iharanira uburenganzira bwa muntu ivuga ko ari ukwibasira abatavuga rumwe n'ubutegetsi ku kigero kitari cyarigeze kibaho mbere muri icyo gihugu, bituma ababarirwa mu bihumbi amacumi bafungwa.

Bwana Sisi yatowe bwa mbere mu mwaka wa 2014 ndetse aza kongera gutorwa mu mwaka ushize wa 2018 nyuma yo gutsinda amatora n'amajwi 97 ku ijana (97%). Ntabwo yigeze ahura n'ihatana rikomeye kuko benshi bajyaga guhatana na we bikomeye baretse kwiyamamaza cyangwa batabwa muri yombi.

Inteko ishingamategeko iniganjemo kandi abashyigikiye Bwana Sisi, ndetse yakomeje kunengwa n'abatavuga rumwe n'ubutegetsi nk'iri aho byo kwemeza ibyifuzo bya perezida.

Ibindi bisa n’ibi