Perezida wa Mali, Ibrahim Boubacar Keïta, yemeye ubwegure bwa Leta ye

Muri uku kwezi kwa kane, abigaragambya bamaganye leta n'ingabo z'amahanga bavuga ko bananiwe gucyemura ikibazo cy'umutekano mucye mu gihugu Uwufise ububasha kw’isanamu Reuters
Image caption Muri uku kwezi kwa kane, abigaragambya bamaganye leta n'ingabo z'amahanga bavuga ko bananiwe gucyemura ikibazo cy'umutekano mucye mu gihugu

Minisitiri w'intebe wa Mali n'abagize leta (gouvernement) ye beguye, nyuma yaho ibikorwa by'umutekano mucye bikomeje kwiyongera mu gihugu.

Ku wa gatatu, habaye igikorwa cyo kumukuraho icyizere ubwo abadepite bavugaga ko minisitiri w'intebe Soumeylou Boubèye Maïga yananiwe gucyemura ikibazo cy'umutekano mucye.

Mu kwezi gushize kwa gatatu, aborozi bamwe bishwe n'itsinda rw'abo mu bwoko bashyamiranye nabwo.

Mu itangazo yasohoye, Perezida Ibrahim Boubacar Keïta wa Mali yavuze ko yemeye ubwegure bwa Bwana Maïga na leta ye.

Iryo tangazo rigira riti: "Minisitiri w'intebe azashyirwaho vuba cyane ndetse na leta nshya ishyirweho bimaze kuganirwaho n'impande zose za politiki".

Igihugu cya Mali gikomeje kugorwa no kuburizamo ibikorwa biteza umutekano mucye kuva aho intagondwa zigendera ku mahame akaze y'idini ya kisilamu bivugwa ko zishamikiye ku mutwe wa al-Qaeda zibasiye igice cy'amajyaruguru y'igihugu kirangwa n'ubutayu.

Nubwo yakomeje ibikorwa bya gisirikare byo guhashya izo ntagondwa ndetse no mu mwaka wa 2015 hakaba harashyizwe umukono ku masezerano y'amahoro, izo ntagondwa ziracyigaruriye igice kinini, mu gihe zavuye mu majyaruguru zikajya mu gice gituwe cyane kiri hagati mu gihugu.

Leta ya Mali yakomeje kotswa igitutu cyane bijyanye no kunanirwa kugarura ituze, by'umwihariko nyuma y'ubwicanyi bwakorewe abo borozi 160 bo mu bwoko bwa Fulani bo mu karere ka Mopti.

Abagabye icyo gitero bari bitwaje imihoro n'imbunda, bagaragaraga nk'abo mu bwoko bwa Dogon, bwaranzwe igihe kinini no gushyamirana n'abaturage b'abimukira bo mu bwoko bwa Fulani.

Igihugu cyaguye mu kantu kubera ubwo bwicanyi, nuko ku itariki ya 5 y'uku kwezi kwa kane abantu babarirwa mu bihumbi amacumi bigabiza imihanda yo mu murwa mukuru Bamako bigaragambya.

Mu ijambo ryanyuze kuri televiziyo y'igihugu ku wa kabiri w'iki cyumweru, Perezida Boubacar Keïta yavuze ko "yumvise uburakari" bwabo.

Ibindi bisa n’ibi