Iyo VAR iza mbere, ibi bintu bitanu ntibiba byarabaye muri Champions League

Iyi shusho yababaje cyane abakunzi ba Manchester City mu minota ya nyuma y'umukino wayihuzaga naTottenham Uwufise ububasha kw’isanamu Getty Images
Image caption Iyi shusho yababaje cyane abakunzi ba Manchester City mu minota ya nyuma y'umukino wayihuzaga naTottenham

Ubuhanga bwo kwifashisha amashusho mu gufata umwanzuro mu mupira w'amaguru (Video Assistant Referee, VAR) bwatangiriye mu gikombe cy'isi mu 2018, bwahise buzanwa no mu mikino y'amakipe yabaye aya mbere iwayo i Burayi muri uyu mwaka.

Kuva ubu buhanga bwatangira gukoreshwa bumaze kwifashishwa mu gufata imyanzuro myinshi ikomeye, -uheruka ni ubwo VAR yafashije umusifuzi kwemeza igitego cya Tottenham bakekaga ko cyatsindishijwe akaboko no kwanga igitego cya Raheem Sterling yatsinze mu minota ya nyuma mu mukino Manchester City yatsinzemo 4 - 3 Tottenham kuwa gatatu ushize.

Iyo bitaba VAR, iki gitego cya Sterling cyari kujyana ikipe ya Pep Guardiola muri kimwe cya kabiri cy'irangiza. Ariko byahiriye Tottenham kubera itegeko ry'ibitego ikipe yatsindiye ahatari iwayo.

Abantu benshi bahora bibuka imikino mpuzamahanga yabayemo ibintu bitari kubaho iyo VAR iba yaraje mbere. Imikino imwe n'imwe iba yararangiye ari andi mateka.

Mu mikino ihuza amakipe yabaye aya mbere i Burayi, ibi bihe bitanu biribukwa cyane:

Ijoro ry'agahinda kubera umusifuzi Obredo (Chelsea 1-1 Barcelona, 2009)

Uwufise ububasha kw’isanamu Getty Images
Image caption Umusifuzi Tom Ovrebo wo muri Norvege yababaje cyane abakinnyi n'abakunzi ba chelsea mu 2009

Amakipe yombi yari yanganyije ubusa ku busa i Camp Nou, i London Chelsea yagombaga gukora iyo bwabaga igatsinda Barcelona, ndetse yabonye igitego hakiri kare.

Ariko imbere y'abafana bayo umusifuzi wo muri Norvege Tom Henning Obredo yimye Chelsea Penaliti nyazo nibura eshatu.

Aka karengane kahindutse agahinda ubwo Barcelona yabonaga igitego mu minota ya nyuma igakomeza kubera igitego cyo hanze, ndetse itwara igikombe ku mukino wa nyuma itsinze Manchester United.

Akarengane kuri Nesta (Barcelona 3-1 AC Milan, 2012)

Uwufise ububasha kw’isanamu AFP
Image caption Nesta yahawe ikarata y'umuhondo n'umusifuzi mu mukino wahuzaga Milan AC na Barcelone mu 2012

Barcelona nanone yongeye kungukira ku basifuzi ubwo ku mukino wa kimwe cya kane na AC Milan warangiraga mu bibazo.

Barcelona yari yabashije kunganya 0 - 0 i Milan, mu kwishyura i Camp Nou igice cya mbere cyarangiye ari 1 - 1.

Umusifuzi w'umuholandi Bjorn Kuipers yahaye Barcelona penaliti ya kabiri muri uyu mukino asifuye ikosa rya Alessandro Nesta kuri Sergio Busquets, ndetse bituma uyu myugariro - uri mu bakomeye babayeho - ahabwa ikarita itukura.

Nyamara nyuma byaje kugaragara ko umukino wari wahagaze mu gihe basifuye ko Nesta yakoze ikosa. Lionel Messi Penaliti ntiyayihushije agahinda gataha i Milan.

Kurarira inshuro ebyiri kwa Ronaldo (Real Madrid 4-2 Bayern Munich, 2017)

Uwufise ububasha kw’isanamu Getty Images
Image caption Ronaldo yatsinze ibitego bitatu harimo n'ibyo mu minota y'inyongera basezerera Bayern mu 2017

Cristiano Ronaldo yatsinze ibitego bitatu harimo n'ibyo mu minota y'inyongera basezerera Bayern.

Ariko ikibazo ni uko uyu musore wo muri Portugal muri ibi bitego bye, bibiri byose yari yaraririye.

Byababaje kurushaho ab'i Bayern kuko umusifuzi Viktor Kassai wo muri Hongiriya yari yanahaye ikarita itukura Arturo Vidal wacaga ibintu icyo gihe muri Bayern.

Real Madrid yarenze hano irakomeza inatwara igikombe ku nshuro ya kabiri muri bitatu yatwaye yikurikiranya.

Agahinda k'abongereza i Paris (Bayern Munich 2-0 Leeds United, 1975)

Uwufise ububasha kw’isanamu Getty Images
Image caption Mu 1975 Leeds United (imyenda yera) yimwe igitego mu buryo budasobanutse bimwa na penaliti ebyiri

Ntibazibagirwa ko Bayern intsinzi yayihawe n'umusifuzi w'umufaransa Michel Kitabdjian wimye penaliti ebyiri zigaragara Leeds ku makosa yose yari yakozwe n'icyamamare myugariro Franz Beckenbauer.

Leeds kandi yimwe igitego bavuze ko habayeho kurarira mu gihe uyu musifuzi Michel yari yabanje kukemeza.

Umujinya wahagurukije abafana ba Leeds kuri Parc des Prince barigaragambya cyane ibintu biracika.

Usibye gutsindwa umukino, Leeds United yanahagaritswe mu marushanwa y'iburayi imyaka ibiri kubera ibyakozwe n'abafana bayo.

VAR iyo ihaba ngo amateka ubu aba yanditse ukundi.

Remontada i Catalunya ngo ntiyari ba gushoboka (Barcelona 6-1 PSG, 2017)

Uwufise ububasha kw’isanamu Getty Images
Image caption Mascherano yemeye ko yagushije mugenzi we Di Maria

Intsinzi ya Barcelona kuri Paris Saint-Germain mu 2017 izaguma mu mateka - Barca, yakoze 'remontada' irenga ibitego 4 - 0 yari yatsindiwe i Paris.

Abakinnyi ba PSG ariko ntibahwemye kuvuga ko ibi Barca yabifashijwemo n'umusifuzi wo muri Turkiya Deniz Aytekin.

Uyu mugabo bavuga ko yimye penaliti igaragara PSG ubwo umukinnyi wabo Angel di Maria yagushwaga mu rubuga rw'amahina na Javier Maschelano, aba bombi bakomoka muri Argentine.

Nyuma y'umukino Maschelano yagize ati "Ni ukuri koko nagushije di Maria ariko ndumva atariyo mpamvu twasezereye PSG".

Umusifuzi Aytekin mu minota ya nyuma cyane y'umukino yahaye penaliti Barca ubwo Luis Suarez bamukozeho gato cyane mu rubuga rw'amahina akagwa nk'igiti batemye.

Abakurikira imikino y'amakipe yabaye aya mbere iwayo iburayi bavuga ko ubu haba hari andi mateka iyo VAR iba yaratangiye gukoreshwa kare.

Ibindi bisa n’ibi