Abigaragambya muri Sudani bahagaritse ibiganiro n’igisirikare

Abigaragambya bavuga ko bafite ubwoba bwuko igisirikare cyakomeza gutegeka Uwufise ububasha kw’isanamu AFP
Image caption Abigaragambya bavuga ko bafite ubwoba bwuko igisirikare cyakomeza gutegeka

Abayoboye abigaragambya muri Sudani batangaje ko bahagaritse kongera kuvugana n'akanama ka gisirikare kayoboye igihugu kuva Omar al-Bashir wari umaze imyaka hafi 30 ku butegetsi yabuvanwaho muri uku kwezi kwa kane.

Bavuga ko aka kanama kagizwe n'"ibisigisigi" by'ubutegetsi bwa Bwana Bashir.

Abigaragambya babarirwa mu bihumbi baracyakambitse imbere y'ikicaro gikuru cy'ingabo mu murwa mukuru Khartoum bategereje ko hatangazwa inama ya gisiviri igomba gufata ubutegetsi.

Igisirikare kivuga ko gishaka gutanga ubutegetsi, ariko ko habaho inama iyoboye Sudani ivanzemo abasirikare n'abasiviri.

Umuvugizi w'abari kwigaragambya Mohamed al-Amin yatangaje ko ubu bafata akanama ka gisirikare nk'"ubutegetsi bwakomeje" bwa Bwana Bashir, bityo ko bazakomeza imyigaragambyo niba bidahindutse.

Barifuza iki?

Imbaga nini iracyari mu mihanda iririmba, ubu ikiri kwibazwa cyane ni ikizabaho mu gihe abo bashaka ko barekura ubutegetsi batabikoze.

Abigaragambya bamaze iminsi bategereje ko abayobozi babo batangaza abakandida bo kujya mu kanama ka gisiviri ko kuyobora Sudani. Mu gihe byari bitegerejwe cyane mu ijoro ryo kuwa gatandatu ntabwo byabaye.

Ibi byatumye habaho impagarara n'impaka nyinshi.

Abayoboye abigaragambya bahise batangaza ko bahagaritse kongera kuganira n'akanama ka gisirikare kayoboye igihugu, basaba abigaragambya gukaza umurego.

Ubutegetsi bw'abasirikare buriho ubu bumaze kubona inkunga irenga miliyari 3 z'amadorari y'Amerika - bahawe na Arabie Saoudite na Leta Zunze Ubumwe z'Abarabu.

Ibi byatumye hakwira amakuru ko igisirikare kitagifite ubushake bwo kurekurira ubutegetsi abasiviri.

Uwufise ububasha kw’isanamu Reuters
Image caption Igisirikare cyahiritse ku butegetsi Bwana Bashir ku itariki ya 11 y'uku kwezi kwa kane, nyuma y'imyigaragambyo yari imaze amezi

Abigaragambya barasaba ko abasirikare bavaho hakajyaho inzibacyuho y'abasiviri igategura amatora.

Abasirikare ntibarasubiza kuri iki cyifuzo cy'abaturage. Ku munsi w'ejo ku cyumweru, batangaje ko bifuza ko hajyaho inzibacyuho ivanze, abasirikare n'abasiviri.

Igisirikare cyarekuye imfungwa za politiki ndetse ku wa gatandatu cyafunze abandi bantu bari bakomeye mu butegetsi bwa Bwana Bashir.

Igisirikare kandi cyongeye gusaba abigarambya kubihagarika bakareka "ubuzima busanzwe bugakomeza".