Bobi Wine yarekuwe na polisi ya Uganda nyuma yo kumuta muri yombi

Bobi Wine (wambaye ingofero itukura) ubwo yatabwaga muri yombi na polisi ya Uganda Uwufise ububasha kw’isanamu SCREENGRAB/Twitter
Image caption Bobi Wine (wambaye ingofero itukura) ubwo yatabwaga muri yombi na polisi ya Uganda

Polisi muri Uganda yafunguye umudepite utavuga rumwe na leta Bobi Wine, nyuma y'amasaha macye imaze kumuta muri yombi ari mu nzira ajya mu gitaramo cyari kubera ku mucanga.

Aho ni naho yari kuganirira n'itangazamakuru ku mpamvu y'ihagarika ry'igitaramo cya Pasika kitabaye ejo hashize.

Amashusho yafashwe yerekana abapolisi bakora mu rwego rwo kurwanya imyigaragambyo bagaragaye bamena imodoka ye i Busabala.

Polisi kandi yanamishe ibyuka biryana mu maso inatatanya abashyigikiye Bobi Wine.

Uyu muririmbyi wabaye umunyapolitike, ni umwe mu bantu bari ku isonga mu banenga bikomeye perezida Yoweri Museveni.

Indirimbo ze zivuga ku bijyanye n'imibereho zatumye akundwa cyane n'urubyiruko.

Perezida Museveni avuga ko atazihanganira ibitaramo birimo politike.

Ubutumwa bwo ku rubuga nkoranyambaga rwa Twitter ku ipaji izwi ya Wine, buvuga ko yari "yatawe muri yombi mu buryo buhutaza".

Ni ubutumwa bugaragaza ko bwanditswe n'undi muntu ukoresha urubuga rwe.

Gutabwa muri yombi kwa Wine - ubundi izina rye ry'ukuri rikaba ari Robert Kyagulanyi Ssentamu - byabaye nyuma y'uko ibitaramo bye by'umuziki biburijwemo ejo hashize kuri Pasika. Byari biteganyijwe kubera mu murwa mukuru Kampala, Arua na Lira.

Mu itangazo polisi ya Uganda yasohoye ku munsi w'ejo ku cyumweru, ivuga ko abateguye ibyo bitaramo "bananiwe kubahiriza amabwiriza akaze kurushaho ajyanye n'umutekano ndetse n'impungenge zijyanye n'ibikorwaremezo by'ahantu hari hateganyijwe kubera ibitaramo".

'Umuziki utandukanywe na politiki'

Ku munsi w'ejo ku cyumweru, Wine yatangaje ko igitaramo cyahagaritswe kibaye icya 124 cye gihagaritswe kuva mu kwezi kwa cumi k'umwaka wa 2017.

Bamwe mu bategura ibitaramo by'umuziki muri Uganda bashyize igitutu kuri leta ko irimo ibahombya kuko baba bashoye menshi mu gutegura ibi bitaramo nyuma leta ikabihagarika.

Ikinyamakuru Daily Monitor kitabogamiye kuri leta ya Uganda kivuga ko ku wa kabiri w'icyumweru gishize Perezida Yoweri Museveni yahuye na bamwe mu bahanzi, abanyamuziki n'abategura ibitaramo ababwira ko bagomba gutandukanya umuziki na politiki.

Muri iyi nama, Bwana Museveni yahaye aba bahanzi miliyari ebyiri z'amashilingi ya Uganda ngo bayagabane nk'impozamarira y'ibyo bahombye ku bitaramo bateguye bigahagarikwa.

Bwana Museveni nubwo yabasabye gutanduakanya umuziki na politiki, we mu bikorwa bye by'ubukangurambaga yagiye agaragara akoresha umuziki n'abanyamuziki banyuranye.

Mu mwaka wa 2016 yiyamamariza manda ya gatanu yo gutegeka Uganda, Bwana Museveni na we yinjiye mu muziki anasohora indirimbo.

Ibindi bisa n’ibi