Abana batatu b'umuherwe wo muri Denmark baguye mu bitero bya Sri Lanka

Anders Holch Povlsen ni umwe mu baherwe bakomeye bo muri Denmark Uwufise ububasha kw’isanamu AFP
Image caption Anders Holch Povlsen ni umwe mu baherwe bakomeye bo muri Denmark

Umugabo wo muri Denmark ufite umutungo wa za miliyari z'amadolari y'Amerika abana be batatu muri bane yari afite bapfiriye mu bitero byibasiye Sri Lanka kuri Pasika nk'uko umuvugizi we yabibwiye BBC.

Uyu muherwe yitwa Anders Holch Povlsen, umuryango we wari wasuye igihugu cya Sri Lanka mu kiruhuko cya Pasika.

Amazina y'abana be bapfuye ntiyatangajwe.

Bwana Holch Povlsen ni umushoramari mu nganda z'imyambaro. Afite imigabane minini muri kompanyi izwi cyane i Burayi icuruza imyambaro yitwa Asos.

Ikinyamakuru Times kivuga ko uyu mugabo ariwe muntu wigenga ufite ubutaka bunini kurusha abandi mu Bwongereza.

Mu butumwa bwo kuri email, umuvugizi wa kompanyi y'iby'imyambaro y'uyu muherwe yitwa Bestseller yagize ati: "Birababaje cyane, ariko dushobora kwemeza ko ayo makuru ari impamo". Ariko asaba ko habaho kubaha ubuzima bwite bw'uyu muryango bityo nta bindi byinshi yarenzaho.

Uwufise ububasha kw’isanamu EPA
Image caption Bwana Holch Povlsen n'umugore we bafite imitungo myinshi muri Scotland

Umunyamategeko wo mu Bwongereza, Anita Nicholson, na we yapfanye n'abana be babiri - Alex w'imyaka 14 y'amavuko na Annabel w'imyaka 11 y'amavuko - muri ibyo bitero ubwo umwiyahuzi yaturikiziga igisasu hafi y'abatonze umurongo muri hoteli ya Shangri-La yo mu murwa mukuru Colombo bategereje ifunguro rya mu gitondo.

Umugabo we Ben Nicholson yarokotse icyo gitero, ashima umugore we "w'igitangaza, nta makemwa" ndetse n'abana babo "batangaje, bazi ubwenge".

Kuri uyu wa kabiri, polisi ya Sri Lanka yatangaje ko hamaze kubarurwa abantu 321 baguye muri ibyo bitero byabaye kuri Pasika, n'abarenga 500 bakomeretse. Iki gihugu cyatangaje ibihe bidasanzwe.

Polisi imaze gufata abantu 40 bakekwaho uruhare muri ibyo bitero. Nta muntu cyangwa umutwe urabyigamba.

Abapfuye benshi ni abanyagihugu biganjemo abakiristu bari mu nsengero bagiye kwizihiza Pasika.

Mu bapfuye harimo n'abantu bo mu bindi bihugu barenga 30, hari n'abataramenywa ibihugu baturukamo.

Mu bo mu mahanga bamenywe harimo:

  • Abongereza umunani, babiri muri bo bafite n'ubwenegihugu bw'Amerika.
  • Abaturage batatu ba Denmark
  • Abahinde batandatu
  • Ba enjeniyeri babiri bo muri Turukiya (nkuko byatangajwe n'ibiro ntaramakuru Anadolu byo muri Turukiya)
  • Abashinwa babiri (nkuko byatangajwe n'igitangazamakuru China Daily cyo mu Bushinwa)
  • Abaturage babiri ba Australia (nkuko byavuzwe na Scott Morrison, minisitiri w'intebe wa Australia)
  • Umuholandi umwe
  • N'umunyaportugali umwe

'Ibitero babifashijwemo n'abo mu mahanga'

Guverinoma ya Sri Lanka ivuga ko ibi byakozwe n'umutwe w'abahezanguni bitwaza idini ya Islam witwa National Thowheeth Jama'ath.

Ibiro by'umukuru w'igihugu byatangaje ibihe bidasanzwe mu gihugu kuva mu ijoro ryo kuri uyu wa mbere, ibi biraha polisi n'ingabo ububasha bwo gufata no kubaza uketswe wese hadakurikijwe ibisanzwe bigenwa n'inkiko.

Kuri uyu wa mbere kandi ikindi gisasu cyaturikiye ku muhanda hafi y'urusengero mu murwa mukuru Colombo.

Iki cyaturitse ubwo polisi yariho igerageza kuvana ibiturika mu modoka yakoreshejwe n'abagabye ibitero.

Ntibiramenyekana niba hari abo cyahitanye cyangwa cyakomerekeje.

Uwufise ububasha kw’isanamu Reuters
Image caption Abapfuye bamaze kugera kuri 310 mu gihe n'abarenga 500 bakomeretse

Mu byumweru bibiri bishize, abayobozi muri iki gihugu ngo bari baburiwe ko uriya mutwe ushobora guturitsa ibisasu.

Rajitha Senaratne, umuvugizi wa guverinoma ya Sri Lanka, avuga ko ibiro bya minisitiri w'intebe byari byahawe aya makuru ariko ko inzego zishinzwe umutekano ntacyo zayakozeho.

Umunyabanga wa leta ushinzwe ingabo yabwiye BBC ko ubutasi butatekerezaga ko byaba ibitero bingana bitya.

Avuga ko amashami yose ya polisi yari yaburiwe, yemeza ko nta cyakozwe ngo bikumirwe.

Yagize ati: "Bavugaga ibikorwa bito, kimwe cyangwa bibiri. Ntabwo byari ibintu nk'ibi".

Perezida wa Sri Lanka we avuga ko amakuru y'ubutasi bafite kugeza ubu agaragaza ko abakoze ibi bikorwa bafashijwe n'imitwe y'iterabwoba yo hanze y'igihugu ari yo mpamvu basaba amahanga kubafasha.

Ibindi bisa n’ibi