Omar al-Bashir arashinjwa impfu z'abiciwe mu myigaragambyo muri Sudani

Bwana Bashir ntarafotorwa kuva yahirikwa ku butegetsi Uwufise ububasha kw’isanamu AFP
Image caption Bwana Bashir ntarafotorwa kuva yahirikwa ku butegetsi

Umushinjacyaha mukuru wa Sudani yashinje Omar al-Bashir wahoze ari Perezida w'iki gihugu ibirego byo gutuma abaturage bagumuka ndetse no kugira uruhare mu bwicanyi bwakorewe abigaragambya.

Ni ibirego bikubiye mu iperereza ku rupfu rw'umuganga wishwe mu gihe cy'imyigaragambyo yagejeje ku ihirikwa ry'ubutegetsi bwa Bwana Bashir mu kwezi gushize kwa kane.

Ntabwo bizwi neza aho Bwana Bashir aherereye. Amakuru avuga ko yatawe muri yombi nyuma yo guhirikwa ku butegetsi n'igisirikare cy'iki gihugu.

Ari kandi no gukorwaho iperereza ku birego byuko yakoresheje amafaranga atazwi aho yaturutse kandi mu buryo bunyuranyije n'amategeko ndetse no gutera inkunga ibikorwa by'iterabwoba.

Umunyamakuru wa BBC Will Ross avuga ko abaturage bamwe ba Sudani batazemera ko koko Bwana Bashir ari mu kaga by'ukuri kubera ibyo byaha ashinjwa mu gihe cyose bazaba bataramwibonera ari mu rukiko.

Mu kwezi kwa cumi na kabiri k'umwaka ushize wa 2018, abigaragambya batangiye imyigaragambyo yo kwamagana icyemezo cya leta cyo gukuba gatatu igiciro cy'umugati.

Nuko bidateye kabiri imyigaragambyo ihinduka iyo kwamagana ubutegetsi bwa Bwana Bashir bwari bumaze hafi imyaka 30 - iyo myigaragambyo iyoborwa n'abaganga.

Hashize ibyumweru bitanu iyo myigaragambyo itangiye, hari ku itariki ya 17 y'ukwezi kwa mbere uyu mwaka, ababibonye bavuze ko inzego zishinzwe umutekano zarashe amasasu nyayo ku bigaragambya zica umuganga umwe.

Uwufise ububasha kw’isanamu EPA
Image caption Abigaragambya bakomeje gusaba ko akanama ka gisirikare gashyira ubutegetsi mu maboko y'abasivile

Yari arimo kuvura abigaragambya bakomeretse iwe mu rugo ku murwa mukuru Khartoum ubwo polisi yarasaga imyuka iryana mu maso kuri iyo nyubako.

Uwabibonye yabwiye BBC ko uwo muganga yasohotse mu nzu amanitse amaboko, abwira abapolisi ko ari umuganga nuko ahita araswa ako kanya.

Ni umwe mu bantu babarirwa muri za mirongo biciwe muri iyo myigaragambyo yo kwamagana leta.

Nyuma yaho abigaragambya bakambitse imbere y'ibiro bikuru by'igisirikare cya Sudani basaba ko igisirikare gihirika ku butegetsi Bwana Bashir.

Akanama ka gisirikare kafashe ubutegetsi ku itariki ya 11 y'ukwezi gushize kwa kane nyuma yo guhirika Bwana Bashir, ariko abigaragambya bakomeje gusaba ko gashyira ubutegetsi mu maboko y'abasivile.

Ibindi bisa n’ibi