Ren Zhengfei washinze Huawei avuga ko Amerika 'iyikengera'

Ren Zhengfei washinze Huawei avuga ko yishimiye kuba iyi kompanyi iri ku isonga mu ikoranabuhanga ry'umurongo mugari wa Internet wa 5G Uwufise ububasha kw’isanamu Getty Images
Image caption Ren Zhengfei washinze Huawei avuga ko yishimiye kuba iyi kompanyi iri ku isonga mu ikoranabuhanga ry'umurongo mugari wa Internet wa 5G

Ren Zhengfei washinze kompanyi ya Huawei ikora ibikoresho by'ikoranabuhanga birimo na za telefone zigendanwa, yakomeje kugaragaza ko ibyemezo bya Leta Zunze Ubumwe z'Amerika ntacyo bivuze kuri iyi kompanyi, avuga ko Amerika "ikengera" ubushobozi bwayo.

Aganira n'igitangazamakuru cya leta y'Ubushinwa, Bwana Ren yavuze ko ingamba iherutse gufatirwa n'Amerika zitayiciye intege, avuga ko nta muntu n'umwe uzayishyikira vuba aha mu ikoranabuhanga ry'umurongo mugari wa Internet wa 5G.

Mu cyumweru gishize, ubutegetsi bw'Amerika bwongeye Huawei ku rutonde rwa za kompanyi zitemerewe gukorana na kompanyi zo muri Amerika cyeretse zibiherewe uruhushya n'ubutegetsi bw'Amerika.

Icyo cyemezo cyakajije ibikorwa by'Amerika byo guca iyi kompanyi yo mu Bushinwa.

Nkuko bigaragara mu nyandiko-mvugo yatangajwe n'igitangazamakuru cya leta y'Ubushinwa, Bwana Ren yagize ati: "Ibyo abanyapolitiki bo muri Amerika bari gukora ubu biradukengera n'imbaraga zacu".

Huawei ikomeje kwibasirwa n'Amerika n'ibihugu by'inshuti zayo bivuga ko hari ibyago mu gukoresha ibikoresho bya Huawei ku mirongo ya tefelone zigendanwa.

Uwufise ububasha kw’isanamu Getty Images

Ku munsi w'ejo ku wa mbere, umwuka mubi watewe n'icyemezo cy'ubutegetsi bw'Amerika kuri Huawei warigaragaje, ubwo kompanyi y'ikoranabuhanga ya Google yahagaritse Huawei gukoresha uburyo buvuguruye (updates) bukoresha za telefone zigendanwa bwitwa Android.

Ku mugoroba w'ejo ku wa mbere, minisiteri y'ubucuruzi y'Amerika yatangaje ko itanze uruhushya rw'agateganyo rw'iminsi 90 rwo gufasha kompanyi zimwe gukomeza kuba zikoresha imirongo ya Huawei n'ibikoresho byayo.

Ariko nubwo biri uko, Bwana Ren yavuze ko Huawei yari yaramaze kwitegura mbere y'ibyo byemezo by'Amerika.

Hashize amezi Huawei ari izingiro ry'ubushyamirane hagati y'Amerika n'Ubushinwa mu ntambara y'ubucuruzi ishyamiranyije ibihugu byombi.

Abakoresha ibikoresho na serivisi bya Huawei bahangayikishijwe n'ingaruka bishobora kubagiraho.