Bobi Wine avuga ko 'yiteguye kuyobora abaturage ba Uganda nta bwoba'

Depite Bobi Wine w'imyaka 37 y'amavuko Uwufise ububasha kw’isanamu AFP

Robert Kyagulanyi uzwi cyane nka Bobi Wine, umunyamuziki akaba n'umudepite mu nteko ya Uganda, avuga ko yiteguye kuvanaho Perezida Yoweri Museveni maze akayobora abaturage nta bwoba.

Ku munsi w'ejo ku wa kabiri, Bobi Wine yavuze ko yagenze mu bice bitandukanye bya Uganda akabona ko abaturage barakajwe n'ubutegetsi buriho.

Ati: "Nageze mu bice bimwe by'icyaro, ariko nabonye ko abantu barambiwe n'ubutegetsi buriho".

"Niteguye kuyobora abaturage ba Uganda nta bwoba".

Ibi yabivugiraga mu karere ka Mukono rwagati muri Uganda mu ihuriro yari yitabiriye rihuje urubyiruko rukina umupira w'amaguru, nkuko bitangazwa n'ikinyamakuru Daily Monitor kitabogamiye kuri leta.

Uganda iritegura amatora y'umukuru w'igihugu ateganyijwe kuba mu mwaka wa 2021.

Muri aya matora ni bwo Bobi Wine avuga ko azatsinda Perezida Museveni w'imyaka 74 y'amavuko, uri ku butegetsi guhera mu mwaka wa 1986, ushaka kwiyamamaza kuri manda ya gatandatu.

Ubutegetsi bwa Uganda bushinja Bobi Wine n'abamushyigikiye guteza umutekano mucye, urugomo, kwangisha abaturage ubutegetsi ndetse n'ubugambanyi, bimwe muri ibi byaha akaba akibikurikiranyweho n'inkiko.

Bobi Wine w'imyaka 37 y'amavuko, yagiye atangaza ko ibyo ashinjwa n'ubutegetsi bishingiye kuri politiki no kunaniza umuntu wese ushaka kuvanaho ubutegetsi bw'ishyaka NRM riri ku butegetsi.

Ibindi bisa n’ibi