Narendra Modi yatorewe indi manda y'imyaka itanu yo kuyobora Ubuhinde

Benshi babonye aya matora nka kamarampaka kuri Bwana Modi watsinze amatora n'ubwiganze bw'amajwi mu mwaka wa 2014 Uwufise ububasha kw’isanamu Reuters
Image caption Benshi babonye aya matora nka kamarampaka kuri Bwana Modi watsinze amatora n'ubwiganze bw'amajwi mu mwaka wa 2014

Minisitiri w'intebe w'Ubuhinde Narendra Modi yatsindiye kuyobora iki gihugu mu yindi manda y'imyaka itanu mu matora rusange yamaze ibyumweru.

Ibyavuye mu matora kugeza ubu birerekana ko ishyaka rye Bharatiya Janata Party (BJP) ari ryo riri bwegukane imyanya igera hafi kuri 300 mu myanya 543 y'abagize inteko ishingamategeko umutwe w'abadepite.

Ishyaka rinini bahanganye Congress Party riyobowe na Rahul Gandhi - biteganyijwe ko ribona imyaka itageze ku 100 - ryemeye ko ryatsinzwe aya matora.

Abantu barenga miliyoni 600 ni bo bitabiriye aya matora amaze ibyumweru bitandatu.

Ku rubuga nkoranyambaga rwa Twitter, Bwana Modi yashimiye abaturage, avugako "icyizere bahaye uruhande rwe kibaha imbaraga zo kurushaho kugera ku byifuzo byabo".

Mu Buhinde, ishyaka cyangwa ihuriro ry'amashyaka rigira ubwiganze mu mutwe w'abadepite iyo rigize imyanya 272 mu myanya 543 iba mu nteko.

Mu mwaka wa 2014, ishyaka rya Nerandra Modi ryari ryagize imyanya 282 - intsinzi nini y'ishyaka iryo ari ryo ryose mu Buhinde mu myaka 30 yari ishize, ryifatanyije n'andi mashyaka rigira imyanya 336.

Icyo gihe Congress Party yatsinzwe bikabije bwa mbere mu mateka yayo kuko yabonye imyanya 44 gusa, yifatanyije n'amashyaka bivuga rumwe ibona imyanya 60 mu nteko.

Uyu mwaka abaturage b'Ubuhinde bagera kuri miliyoni 900 bari bemerewe gutora - aya akaba ari yo matora ya mbere yitabiriwe n'abantu benshi cyane mu mateka y'isi.

Hifashishijwe ikoranabuhanga, ibyayavuyemo biri gutangazwa mu byiciro. Ibyayavuyemo bya nyuma biteganyijwe ko bitangazwa mu masaha ari imbere cyangwa nyuma yaho.

Minisitiri w'intebe w'Ubuhinde ni we ugira ububasha bw'ubutegetsi bwa guverinoma y'Ubuhinde. Ashyirwaho n'ishyaka cyangwa ihuriro ry'amashyaka ryatsindiye ubwiganze mu nteko umutwe w'abadepite.

Ibindi bisa n’ibi