Ibitero ku bigo bivurirwamo Ebola muri Kongo biri kwiyongera

Hamwe mu havurirwa Ebola i Bunia muri Kongo Uwufise ububasha kw’isanamu AFP/Getty Images
Image caption Hamwe mu havurirwa Ebola i Bunia muri Kongo

Abakuriye ibikorwa by'ubuzima muri Repubulika ya Demokarasi ya Kongo bavuga ko hamaze kugabwa ibitero birenga 130 ku bigo bivurirwamo Ebola kuva yatangazwa ko yongeye kwaduka muri iki gihugu mu kwezi kwa munani mu mwaka ushize wa 2018.

Abantu bane bamaze kwicwa naho abandi bagera hafi kuri 40 barakomereka.

Ni ku nshuro ya 10 Ebola yadutse muri Kongo. Yahadutse bwa mbere mu mwaka wa 1976.

Igitero giheruka kuba ku wa kane w'iki cyumweru mu mujyi wa Butembo mu ntara ya Kivu y'amajyaruguru, mu burasirazuba bw'iki gihugu, cyatumye ibigo bitandatu bivurirwamo Ebola bifunga imiryango n'abaganga bajya kwihisha.

Abakora mu bikorwa by'ubuzima muri uyu mujyi bakoze imyigaragambyo y'igice, basaba ko hagira igikorwa kurushaho mu kubarinda mu kazi kabo.

Kutagirirwa icyizere n'abaturage - bamwe bavuga ko Ebola itabaho naho abandi bamwe bakavuga ko yazanywe n'abo baganga - ndetse n'umutekano mucye umaze imyaka urangwa muri aka karere, byagize uruhare mu ngorane abakora mu bikorwa by'ubuvuzi bwa Ebola bari guhura nabyo.