Arahizwa, Perezida Ramaphosa yasezeranyije 'ibihe bishya' muri Afurika y'epfo

Cyril Ramaphosa ubwo yarahizwaga ku munsi w'ejo ku wa gatandatu Uwufise ububasha kw’isanamu Reuters
Image caption Cyril Ramaphosa ubwo yarahizwaga ku munsi w'ejo ku wa gatandatu

Perezida Cyril Ramaphosa w'Afurika y'epfo yasezeranyije kuzana "icyizere n'ivugurura" muri iki gihugu nyuma yo kurahizwa ku kibuga cyo mu murwa mukuru Pretoria.

Uyu mukuru w'ishyaka rya African National Congress (ANC), yasezeranyije guhashya ruswa no kuvugurura ubukungu buri mu bibazo kuri ubu.

Yatowe mu ntangiriro y'uku kwezi kwa gatanu n'ubwiganze bw'amajwi 57.5 ku ijana (57.5%) - amajwi macye ya mbere ishyaka ANC rigize kuva ryagera ku butegetsi mu myaka 25 ishize.

Ku ikubitiro, Bwana Ramaphosa yabanje kugera ku butegetsi asimbuye Jacob Zuma mu mwaka ushize wa 2018, nyuma yaho Bwana Zuma ashinjwe ibirego bya ruswa.

Bwana Ramaphosa abaye Perezida wa gatanu utowe binyuze muri demokarasi kuva ubutegetsi bw'ivangura bwa apartheid burangiye mu mwaka wa 1994.

Mu ijambo yagejeje ku bantu ibihumbi 32 bari ku kibuga cy'umukino wa rugby cy'i Pretoria, yagize ati: "Iki ni igihe gikomeye ku gihugu kikiri gito nk'iki cyacu".

Yasezeranyije ati: "Kuri ubu butaka, ntihazongera kubaho ukundi umuntu unanirwa kubona iby'ibanze nkenerwa mu buzima".

Uwufise ububasha kw’isanamu EPA
Image caption Hari imbaga izunguza ibendera ry'Afurika y'epfo ubwo Perezida Ramaphosa yarahizwaga
Uwufise ububasha kw’isanamu Reuters
Image caption Umwiyereko w'indege zanyuze hejuru y'ikibuga cyaberagamo ibyo birori, ziri mu byasusurukije ababyitabiriye

Abategetsi b'ibihugu birenga 40 bari mu bitaribiriye umuhango w'irahizwa rya Bwana Ramaphosa. Yabashimiye kubera "kwigomwa kwabo n'inkunga idahuga" mu "ibohozwa ry'igihugu cyacu".

Yashimiye Nelson Mandela, avuga ko nyuma y'imyaka 25 Bwana Mandela atowe muri demokarasi nka Perezida wa mbere w'Afurika y'epfo, iki gihugu "cyaciye mu bihe byombi by'uburumbuke n'amapfa".

Uwufise ububasha kw’isanamu AFP
Image caption Ababyinnyi b'imbyino gakondo bari mu basusurukije abitabiriye uwo muhango
Uwufise ububasha kw’isanamu Reuters
Image caption Perezida Ramaphosa asuhuza imbaga nyuma yo kurahizwa

Bwana Ramaphosa yagize ati: "Abanya-Afurika y'epfo benshi baracyarara ubusa, benshi bahitanwa n'indwara zishobora kuvurwa, benshi babayeho mu buzima bubabaje".

"Abaturage benshi cyane bacu nta kazi bafite, cyane cyane urubyiruko" - 27 ku ijana (27%) byarwo nta kazi bafite.

Yavuze ko ibibazo iki gihugu gifite "bihari by'ukuri", ariko ko "atari ingorabahizi", ko "bishobora gucyemurwa".

Byitezwe ko Bwana Ramaphosa ahitamo abagize guverinoma mu minsi micye iri imbere - ibintu ubwabyo by'ingorane muri iri shyaka rya ANC ryacitsemo ibice byinshi.

Uwufise ububasha kw’isanamu Reuters
Image caption Hari akarasisi ka gisirikare

Daniel Silke, ukuriye ikigo Political Futures Consultancy kijya inama mu bya politiki, yabwiye ibiro ntaramakuru Reuters ko Bwana Ramaphosa azasuzumwa ku "kigero cyo hejuru cyane" ku byo azageraho, kandi ko iryo suzuma ritangirira ku bo azahitamo bagize guverinoma.

Bwana Zuma ntabwo yitabiriye irahizwa ry'uwamusimbuye, mu gihe ku munsi wabanje wo ku wa gatanu yari yitabye urukiko rwo mu mujyi wa Pietermaritzburg bijyanye n'ibirego bya ruswa.

Yabwiye abamushyigikiye ko nta mwanya yari afite kuko ari "guhangana ngo agume hanze ya gereza".

Uwufise ububasha kw’isanamu Reuters
Image caption Jacob Zuma yaririmbanye n'abamushyigikiye ubwo ku wa gatanu yavaga mu cyumba cy'urukiko rwo mu mujyi wa Pietermaritzburg

Ibindi bisa n’ibi