Perezida Trump yahinyuye 'udutwaro dutoya' Koreya ya ruguru iherutse kugerageza

Minisitiri w'intebe w'Ubuyapani, Shinzo Abe (iburyo), yakinnye umukino wa golf ho gato na Perezida Donald Trump (ibumoso) w'Amerika Uwufise ububasha kw’isanamu Reuters
Image caption Minisitiri w'intebe w'Ubuyapani, Shinzo Abe (iburyo), yakinnye umukino wa golf ho gato na Perezida Donald Trump (ibumoso) w'Amerika

Perezida Donald Trump wa Leta Zunze Ubumwe z'Amerika yahinyuye impungenge ku magerageza y'ibisasu bya misile aherutse gukorwa na Koreya ya ruguru, asa nk'unyuranya n'umujyanama we bwite mu bijyanye n'umutekano w'igihugu.

Mu butumwa yatangaje ku rubuga nkoranyambaga rwa Twitter amaze kugera mu Buyapani kuri iki cyumweru, Bwana Trump yise ibyo bisasu bya misile "udutwaro dutoya".

John Bolton, umujyanama w'Amerika mu bijyanye n'umutekano w'igihugu, ku munsi w'ejo ku wa gatandatu yavuze ko ayo magerageza y'ibisasu bya misile ya Koreya ya ruguru anyuranyije n'ibyemezo umuryango w'abibumbye (ONU) wayifatiye.

Perezida Trump yatangiye uruzinduko rwe rw'akazi mu Buyapani akinanaho gato umukino wa golf na Shinzo Abe, Minisitiri w'intebe w'iki gihugu.

Aba bategetsi bombi basangiye ifunguro rya mu gitondo kuri iki cyumweru, mbere yuko bajya gukinira golf gato ku kibuga kiri mu ntara ya Chiba, hanze y'umurwa mukuru Tokyo.

Bwana Trump yavuze ko ashaka kugirana amasezerano n'Ubuyapani yo gukemura icyo yise ubusumbane mu buhahirane mu by'ubucuruzi hagati y'ibihugu byombi.

Uwufise ububasha kw’isanamu Reuters
Image caption Inama iheruka guhuza Perezida Trump na Kim Jong-un, umutegetsi mukuru wa Koreya ya ruguru, yabereye i Hanoi ku murwa mukuru wa Vietnam, yarangiye ntacyo igezeho

Bwana Trump yanditse kuri Twitter ati: "Koreya ya ruguru yarashe udutwaro dutoya tumwe na tumwe, twateye impungenge bamwe mu bo dukorana n'abandi, ariko kuri jye siko bimeze". Yongeyeho ati: "Mfite icyizere ko umutegetsi Kim azubahiriza ibyo yansezeranyije".

Bitari ku nshuro ya mbere, ubwo butumwa bwe bwabaye nk'ubunyuranya mu mvugo na Bwana Bolton, ndetse n'iki gihugu cy'Ubuyapani yagiriyemo uruzinduko rw'akazi.

Mu cyumweru gishize, Bwana Abe yavuze ko amagerageza y'ibisasu bya misile ya Koreya ya ruguru "ababaje cyane".

Bwana Bolton na Bwana Abe bombi bashinja Koreya ya ruguru kurenga ku byemezo ONU yayifatiye.

Uku kubusanya hagati ya Perezida Trump n'umujyanama we mu by'umutekano, kuje gukurikira ukundi kunyuranya mu bijyanye na politiki mpuzamahanga, harimo nko ku kuntu Amerika yakwitwara mu kibazo cya Venezuela ndetse no ku mubano wayo na Irani.