Mu Burundi impande zombi ntacyo ziteze ku nama y’umutekano ya ONU iza kuba uyu munsi

Inteko ya ONU Uwufise ububasha kw’isanamu Getty Images

Uyu munsi saa cyenda ku isaha y'i New York akanama k'umuryango w'abibumbye gashinzwe amahoro ku isi karaterana kiga ku kibazo cy'Uburundi, mu gihe leta n'abatavuga rumwe nayo ntacyo bayitezemo.

Michel Kafondo, intumwa yihariye y'umunyamabanga mukuru w'umuryango w'abibumbye ku kibazo cy'Uburundi, arageza kuri aka kanama uko yabonye ibintu byifashe.

Inyandiko zigaragara ku rubuga rw'aka kanama ka ONU zivuga ko mu Burundi hari ubwicanyi, kuburirwa irengero kw'abantu, gufunga binyuranyije n'amategeko, kugenzura bikabije imiryango itegamiye kuri leta, gucecekesha no gufunga itangazamakuru ryigenga n'ibindi.

Ubutegetsi bw'u Burundi bwahakanye kenshi ibi birego, buvuga ko mu gihugu hari amahoro n'ituze, ko ibyo birego ari ibigamije guharabika ubutegetsi no gushaka kwivanga mu bireba Uburundi gusa.

Hagati muri uku kwezi kwa gatanu, Ambasaderi Albert Shingiro uhagarariye Leta y'Uburundi muri ONU yamaganye iyi nama n'abayitumije.

Avuga ko iyi nama ari "umugambi mubisha mushya wo kurwanya Uburundi wa bimwe muri ibi bihugu byagize uruhare mu gushaka guhirika ubutegetsi mu mwaka wa 2015".

Abatavuga rumwe n'ubutegetsi na bo ntacyo bayitezeho

Ishyaka ritavuga rumwe n'ubutegetrsi mu Burundi rya "Mouvement pour la Solidarité et la Démocratie" (MSD) rya Alexis Sinduhije, ryasohoye itangazo rivuga ko Abarundi nta kintu biteze muri iyi nama.

Iri shyaka rivuga ko "kuva mu myaka itanu ishize Abarundi bamenyereye ko iriya nama idashoboye gushyira mu ngiro imyanzuro yayo ku Burundi buyobowe n'umutegetsi wica abaturage be".

MSD ivuga ko imyanzuro y'iriya nama "ntacyo izahindura ku mibereho mibi cyane y'impunzi ibihumbi amagana z'Abarundi bari mu nkambi na miliyoni z'Abarundi batisanzuye mu gihugu cyabo".

Muri iri tangazo yasohoye ku munsi w'ejo ku wa mbere, MSD ivuga ko ONU ikomeje kurebera ibibazo byo mu Burundi, aho abahuza boherejwe bananiwe, na Benjamin Mkapa yarekeye aho.

Iri shyaka risoza rivuga ko "Abarundi ntacyo biteze mu nama iterana ejo [ni ukuvuga uyu munsi]".

Hagati aho, Ambasaderi Albert Shingiro uhagarariye Uburundi muri ONU, yatangaje ubutumwa ku rubuga nkoranyambaga rwa Twitter ku munsi w'ejo ku wa kabiri nijoro avuga ko iyi nama yasubitswe.