Habonetse 'ibihumyo byica kuri 99% imibu itera malaria'

Umubu utera malaria Uwufise ububasha kw’isanamu Science Photo Library

Uduhumyo duto cyane - dukujijwe mu buryo bwa gihanga ngo turusheho kwica - dushobora kwica imibu itera malaria mu gihe gito, nkuko ubushakashatsi bushya bubivuga.

Igeragezwa ry'ubushobozi bw'ubu bwoko bw'ibihumbyo ryakorewe muri Burkina Faso, ryerekanye ko 99% y'imibu yashyizwe aho ryakorewe yapfuye mu gihe kitarenze iminsi 45.

Malaria ikwizwa n'umubu w'ingore uruma ufite iyi ndwara ukayitera undi muntu urumye.

Buri mwaka ku isi, abantu bagera hafi kuri miliyoni 219 bandura malaria, muri bo abarenga 400,000 ikabahitana.

Abahanga bo muri Kaminuza ya Maryland muri Leta Zunze Ubumwe z'Amerika bafatanyije n'ikigo cy'ubushakashatsi IRSS cyo muri Burkina Faso, ni bo bakoze ubu bushakashatsi.

Bemeza ko ubu bwoko bw'ibihumyo bito cyane mu mimerere yabyo bisanzwe byifitemo 'microbes' zica imibu y'ingore ikwiza malaria.

Icyo aba bahanga bakoze ni ukubyongerera ubu bushobozi, nkuko Porofeseri Raymond St Leger wo muri iyi Kaminuza yabibwiye BBC.

Ubu bushakashatsi bwakozwe gute?

Mu bushakashatsi hatunganyijwe ubuso bushyirwamo imibu 1,500, ibimera n'ibindi byose imibu ikenera ngo ibeho inororoke maze aho hose bahafungisha utuyungiro dutuma imibu itavamo.

Uduce tw'ibi bihumyo bito batuvanze n'amavuta basiga henshi muri ubu buso. Iyi mibu aho kororoka yarapfuye, mu minsi 45 hari hasigaye imibu 13 gusa.

Abakoze ubu bushakashatsi bavuga ko intego yabo atari ukurimbura ubwoko bw'iyi mibu itera malaria, ko ahubwo ari ugukumira ikwirakwira rya malaria rikorwa nayo.

Aba bashakashatsi bavuga ko utu duhumyo nta ngaruka twagize ku bindi bimera n'ibinyabuzima nk'inzuki byari byashyizwe muri ubu buso bwakorewemo ubushakashatsi.

Dr Tony Nolan, umuhanga wo mu ishuri ry'ubuvuzi bw'indwara zo mu gace k'imirongo mbariro y'isi, utari mu bakoze ubu bushakashatsi, avuga ko ibyo bwagezeho bishimishije, ariko hakwiye ubundi bushakashatsi ku mpamvu utu dukoko dusigaye tubasha guhangana n'imiti itwica.

Ibindi bisa n’ibi