Abasirikare bayoboye Sudani bemeje ko hagiye kuba amatora

Abagore bigaragambya muri Sudani Uwufise ububasha kw’isanamu AFP
Image caption Abagore bigaragambya muri Sudani

Nyuma yuko imyigaragambyo ifashe intera ndende muri Sudani, inama ya gisirikare iyoboye iki gihugu mu nzibacyuho yatangaje ko ihagaritse ibindi byose ikaba ubu igiye gutegura amatora mu mezi icyenda.

Mu itangazo yasohoye, umuyobozi w'inama ya gisirikare iyoboye Sudani ubu, Jenerali Abdel Fattah al-Burhan, yavuze ko "bahagaritse ibiganiro ndetse n'ibyo bemeranyijweho mbere byose n'abahagarariye abigaragambya".

Yavuze ko mu gihe cy'amezi icyenda hazaba amatora azarebererwa n'indorerezi zo mu gihugu n'izo mu mahanga.

Batangaje ibi nyuma yo kunengwa n'amahanga - arimo Leta Zunze Ubumwe z'Amerika n'umuryango w'ubumwe bw'Uburayi - yamaganye ihohoterwa rikorerwa abigaragambya bivugwa ko rimaze guhitana abagera kuri 30 kugeza ubu.

Umuryango w'ubumwe bw'Afurika wamaganye iri hohoterwa unasaba ibindi bihugu kwirinda kwivanga mu bya Sudani.

Abantu banyuranye muri Sudani barakajwe no kuba ibihugu bya Arabia Saoudite, Leta Zunze Ubumwe z'Abarabu na Misiri biri gufasha inama ya gisirikare iyoboye Sudani.

Uwufise ububasha kw’isanamu AFP/Getty Images
Image caption Inzego z'umutekano za Sudani zakomeje kugaragara zishinga ibirindiro mu nkengero y'ibiro bikuru bya gisirikare by'iki gihugu

Iyi nama ya gisirikare hamwe n'abigaragambya bari barumvikanye inzibacyuho y'imyaka itatu ngo hajyeho ubutegetsi bw'abasiviri, ariko bananirwa kumvikana abazaba bagize ubuyobozi bwayo.

Yafashe ubutegetsi mu kwezi kwa kane ubwo igitutu cy'imyigaragambyo y'abaturage cyari kimaze guhirika ku butegetsi Omar al-Bashir yari amazeho imyaka 30.

Abaturage bakomeje gusaba ko abasirikare barekura ubutegetsi bakabuha abasiviri. Mu minsi micye ishize, imyigaragambyo yarushijeho gukara no gutuma ubuzima mu gihugu busa n'ubuhagarara.

Uwufise ububasha kw’isanamu AFP
Image caption Abigaragambya mu murwa mukuru Khartoum batwitse amapine bagerageza gukumira inzego z'umutekano za Sudani

Ibindi bisa n’ibi