Perezida Trump avuga ko yumvikanye na Mexico ku masezerano yo kuyirinda imisoro kubera abimukira

Abimukira babarirwa mu bihumbi bahunga ubukene n'ibikorwa by'urugomo muri Amerika yo hagati, bizeye kubona ubuzima bwiza muri Amerika Uwufise ububasha kw’isanamu AFP
Image caption Abimukira babarirwa mu bihumbi bahunga ubukene n'ibikorwa by'urugomo muri Amerika yo hagati, bizeye kubona ubuzima bwiza muri Amerika

Igihugu cya Mexico cyemeye "gufata ingamba zidasanzwe zitigeze zibaho mbere" mu gufasha gukumira abimukira berekeza muri Leta Zunze Ubumwe z'Amerika, mu rwego rwo kwirinda gushyirirwaho imisoro mu bucuruzi Perezida Donald Trump yari yagikangishije.

Mu rukurikirane rw'ubutumwa bwo ku rubuga nkoranyambaga rwa Twitter, Bwana Trump yahishuye ko amasezerano yagezweho yo guhagarika iyo misoro, ariko ko bitazwi igihe ibyo bizamara.

Yari yakangishije ko azashyira mu bikorwa imisoro iri ku kigero cya 5 ku ijana (5%), byari biteganyijwe ko yagombaga kugenda yiyongera buri kwezi, mu gihe cyose Mexico itari kugira icyo ikora mu gukumira abimukira.

Byari byitezwe ko iyo misoro itangira kwakwa guhera ku wa mbere w'icyumweru gitaha.

Uwufise ububasha kw’isanamu EPA
Image caption Perezida Donald Trump w'Amerika

Ayo masezerano, yanemejwe mu butumwa bwo kuri Twitter na Minisitiri w'ububanyi n'amahanga wa Mexico, Marcelo Ebrard, ashyizweho umukono nyuma y'iminsi itatu y'ibiganiro Amerika yasabagamo Mexico gukumira abimukira bava muri Amerika yo hagati.

Bwana Trump yatunguye abo mu ishyaka rye ry'abarepubulikani ubwo mu cyumweru gishize yatangazaga iyo misoro yateganyaga gushyiriraho Mexico.

Mu kwezi kwa kabiri, yari yatangaje ibihe bidasanzwe ku mupaka Amerika ihana na Mexico, avuga ko ari ngombwa mu rwego rwo guhangana n'icyo yise akaga gatewe n'abimukira babarirwa mu bihumbi batujuje ibyangombwa bambuka uwo mupaka.