Abayoboye imyigaragambyo muri Sudani bahamagariye abaturage kugumuka

Abantu bakomerekeye mu bikorwa by'ihohotera by'igisirikare bari koroherwa mu bitaro Uwufise ububasha kw’isanamu Reuters
Image caption Abantu bakomerekeye mu bikorwa by'ihohotera by'igisirikare bari koroherwa mu bitaro

Umuryango uhuriyemo impirimbanyi za demokarasi muri Sudani wasabye ko habaho ibikorwa byo kugumuka mu gihugu hose, nyuma y'iminsi habaye ibikorwa by'ihohotera by'igisirikare byahitanye abigaragambya babarirwa muri za mirongo.

Itangazo ry'ishyirahamwe ry'abakozi (SPA) riyoboye imyigaragambyo muri iki gihugu risaba ko ibi "bikorwa byo kugumuka bitangira kuri iki cyumweru bikazarangira ari uko gusa hagiyeho leta iyobowe n'abasivile".

Ryongeraho riti: "Kugumuka ni igikorwa cy'amahoro gifite ubushobozi byo gucisha bugufi abafite intwaro zikomeye cyane kurusha izindi zose ku isi".

Ibi bibaye nyuma yaho ku wa gatanu w'iki cyumweru abayobozi batatu b'abatavuga rumwe n'ubutegetsi baterewe muri yombi.

Uko ari batatu, bari bamaze kugirana ibiganiro na Minisitiri w'intebe wa Ethiopia uri kugerageza kubyutsa ibiganiro by'amahoro hagati y'impande zombi.

Abakorana bya hafi na Mohamed Esmat, umunyapolitiki utavuga rumwe n'ubutegetsi muri Sudani, bavuze ko yatawe muri yombi ku wa gatanu nyuma gato yo kugirana ibiganiro na Minisitiri w'intebe wa Ethiopia Abiy Ahmed.

Ni mu gihe Ismail Jalab, ukuriye umutwe w'inyeshyamba wa SPLM-N n'umuvugizi we Mubarak Ardol bo batawe muri yombi mu gitondo cyo ku munsi w'ejo ku wa gatandatu.

Igisirikare ntacyo kiravuga kuri iryo tabwa muri yombi.

Kugeza ubu, ntibizwi uko uko kuguma kuzakorwa, ariko hari amakuru ava mu murwa mukuru Khartoum avuga ko mbere yuko imigumuko itangira polisi yataye muri yombi bamwe mu b'ingenzi mu bagize iryo shyirahamwe rya SPA.

Uwufise ububasha kw’isanamu Reuters
Image caption Minisitiri w'intebe wa Ethiopia Abiy Ahmed ari kugerageza gutuma impande zombi zisubira mu biganiro

Umunyamakuru wa BBC Mary Harper avuga ko uko kugumuka guca amarenga ko ibikorwa by'ubuhuza bya Bwana Abiy nta gaciro byahawe n'igisirikare.

Yongeraho ko igisirikare cya Sudani gisa nk'icyatewe imbaraga no gushyigikirwa mu buryo bwa politiki n'amafaranga n'ibihugu bya Arabie Saoudite, Leta Zunze Ubumwe z'Abarabu (United Arab Emirates) na Misiri, ibihugu avuga ko nta na kimwe muri byo cyifuza kubona demokarasi ishinga imizi muri Sudani.

Abayoboye imyigaragambyo banze ubusabe bw'inama ya gisirikare bwuko habaho ibiganiro, bavuga ko nta cyizere ishobora kugirirwa nyuma yo kurasa mu bigaragambya badafite intwaro.

Kuva Omar al-Bashir yahirikwa ku butegetsi - yari amazeho imyaka 30 - n'igisirikare mu kwezi kwa kane ku gitutu cy'abagiragambya, Sudani iyobowe n'inama ya gisirikare.

Yasezeranyije ko ifashe ubutegetsi by'inzibacyuho yitegura kubushyikiriza abasivile, ariko abigaragambya bari bakomeje gukambika ku biro bikuru by'igisirikare biri i Khartoum, kugeza ubwo inzego z'umutekano zibarashemo ku wa mbere w'iki cyumweru.