Ebola yishe umwana w’imyaka 3 wavuye muri Uganda, ni murumuna w'uwo yishe mbere

Gushyingura abishwe na Ebola bikorwa mu buryo bwihariye kuko imirambo yabo yanduza cyane Uwufise ububasha kw’isanamu Getty Images
Image caption Gushyingura abishwe na Ebola bikorwa mu buryo bwihariye kuko imirambo yabo yanduza cyane

Umwana w'imyaka itatu wari urwaye Ebola yamwishe hashize amasaha macye avanywe muri Uganda agejejwe muri Repubulika ya Demokarasi ya Kongo mu kigo cyita ku barwaye iyi ndwara.

Uyu mwana ni murumuna w'undi w'imyaka itanu wishwe na Ebola ku wa kabiri w'iki cyumweru. Ku wa gatatu iyi ndwara yishe na nyirakuru w'aba bana.

Uyu mwana w'umuhungu w'imyaka itatu yasubijwe muri Kongo ari kumwe n'abo mu muryango we bane kuri uyu wa kane bavanywe muri Uganda ku bwumvikane bw'abashinzwe ubuzima b'impande zombi.

Dr Gaston Tshapenda, umuyobozi w'ibikorwa byo guhangana na Ebola mu gace ka Beni muri Kongo, yabwiye BBC ko uyu mwana yapfuye ejo ku wa kane akigezwa mu kigo cyita ku barwaye Ebola.

Bavuga ko uyu mwana yanduye Ebola ayivanye kuri sekuru wari uyirwaye mu gace ka Beni muri Kongo. Na we yaje kumuhitana mbere yuko uyu mwana n'abo mu muryango we bajya muri Uganda.

Abo muri uyu muryango bikekwa ko bakoranyeho n'aba bapfuye n'abanduye, ubu bose bari mu kato mu kigo gikurikirana iyi ndwara muri Kongo.

Uyu mwana wapfuye, abaye umuntu wa gatatu mu bishwe na Ebola bageze ku butaka bwa Uganda mu gace ka Kasese gahana imbibi na Kongo.

Ikigo Wellcome Trust cyo mu Bwongereza gikora ubushakashatsi mu bijyanye n'ubuvuzi, muri iki cyumweru cyatangaje ko Ebola iri muri Afurika yo hagati ubu ari yo ya mbere mbi cyane ibayeho ku isi nyuma y'iyibasiye ibihugu bimwe byo mu burengerazuba bw'Afurika guhera mu 2013 kugera mu 2016 igahitana abantu 11,310.

Abantu bandurira Ebola mu gukora ku maraso cyangwa andi matembabuzi yose ava ku mubiri w'uyirwaye.

Uwanduye Ebola atangira ahinda umuriro, agacika intege cyane, akababara imitsi no mu muhogo.

Uko irushaho gukomera, uyirwaye araruka, agacibwamo, akavira imbere nyuma akava amaraso mu bice byo hanze by'umubiri.