Perezida Nkurunziza w’u Burundi yageneye ishimwe Papy Faty wapfiriye mu kibuga

Perezida Nkurunziza yashyikirije nyina wa Papy Faty ishimwe ry'umudari na miliyoni ebyiri Uwufise ububasha kw’isanamu PUBLIC DOMAIN
Image caption Perezida Nkurunziza yashyikirije nyina wa Papy Faty ishimwe ry'umudari na miliyoni ebyiri

Mu kwizihiza imyaka 57 y'ubwigenge bw'u Burundi, Perezida Pierre Nkurunziza yahembye abantu banyuranye, muri bo harimo umukinnyi Papy Faty wapfuye mu kwezi kwa kane aguye mu kibuga.

Bwana Nkurunziza yafashe umwanya munini ashimira anahemba abo yavuze ko bagize uruhare mu guteza imbere ubwigenge bw'u Burundi, kumenyakanisha u Burundi, kubuvuganira no kubushakira inshuti.

Mu birori byabereye i Bujumbura mu muhanda uri hafi ya Stade Louis Rwagasore (igiye kwitwa Stade Intwari), Bwana Nkurunziza yavuze ko Papy Faty yaserukiraga u Burundi mu bindi bihugu yakinnyemo.

Uyu mukinnyi yakiniye Intamba Mu Rugamba kuva mu 2008, yakinnye mu makipe atandukanye mu Rwanda, muri Turkiya, Afurika y'Epfo na eSwatini aho yaguye.

Bwana Nkurunziza yibukije ko uyu mukinnyi, uvuka mu gace ka Cibitoke muri Bujumbura, yari mu ikipe y'Intamba yakoze amateka ikajyana iki gihugu bwa mbere mu gikombe cya Afurika.

Nyuma y'igihe kinini adahamagarwa mu ikipe y'igihugu kubera uburwayi, umwaka ushize Papy Faty yongeye guhamagarwa mu mikino yo gushaka umwanya mu gikombe cya Afurika.

Papy Faty yari mu ikipe y'Intamba yakinnye umukino wa tariki 23 z'ukwezi kwa gatatu i Bujumbura, aho banganyije na Gabon, bakabona umwanya mu gikombe cya Afurika, Gabon igasigara. Kuri uyu mukino Papy Faty yinjiye mu kibuga asimbuye.

Tariki 25 z'ukwezi kwa kane kwakurikiyeho uyu mukinnyi yaguye mu kibuga muri eSwatini mu ikipe yakinagamo ahita apfa.

Uyu munsi, Bwana Nkurunziza yagize ati:"yaritanze bidasanzwe anatwinjiza mu mateka bwa mbere twinjira muri CAN...Yitabye Imana ari kwitegurira guserukira Intamba Mu Rugamba, aka ni akaryo ko gushimira umuryango we, nubwo atagihari".

Uwufise ububasha kw’isanamu Getty Images
Image caption Papy Faty yashimiwe ko yaserukiye neza igihugu cye aho yakinnye hose

'Intamba zakoze byiza cyane muri CAN'

Bwana Nkurunziza yavuze ko ikipe y'u Burundi ititwaye nabi mu gikombe cya Afurika. Iyi kipe yasezerewe idatsinze umukino n'umwe cyangwa ngo itsinde igitego mu mikino itatu yakinnye.

Yagize ati:"Turanashimira Intamba mu Rugamba kuko zitadutetereje, nta uvuka rimwe ngo yuzure ingombyi, ibyo zakoze ni byiza cyane kandi imbere ni heza cyane, turabashyigikiye".

Mu bandi bahawe amashimwe kuri uyu munsi harimo;

-Minisitiri Dr Deo Guide Rurema, ushinzwe ubuhinzi,

-Ambasaderi Albert Shingiro, uhagarariye u Burundi mu muryango w'abibumbye,

-Prof Juma Shaban, umwarimu w'imibare muri Kaminuza y'u Burundi,

-Ambasaderi Joël Louvet, wari uhagarariye u Bufaransa i Burundi (2006 - 2010),

N'abandi biganjemo abasirikare n'abapolisi.