'Igitero cy'indege cyahitanye abantu barenga 44' ku kigo gifungiyemo abimukira muri Libya

Abantu bateraniye hanze y'icyo kigo gifungirwamo abimukira nyuma y'icyo gitero Uwufise ububasha kw’isanamu AFP
Image caption Abantu bateraniye hanze y'icyo kigo gifungirwamo abimukira nyuma y'icyo gitero

Abategetsi muri Libya bavuga ko abantu barenga 44 biciwe mu gitero cy'indege ku kigo gifungirwamo abimukira.

Abandi barenga 130 bakomerekeye muri icyo gitero, cyabereye mu kigo kiri mu karere ka Tajoura kari mu nkengero y'umurwa mukuru Tripoli.

Benshi mu bishwe ni abimukira b'Abanyafurika.

Umuryango w'abibumbye uvuga ko ibyabaye "bigaragara neza ko ari icyaha cyo mu ntambara", mu gihe umuryango w'ubumwe bw'Afurika nawo wasohoye itangazo usaba ko hakorwa "iperereza ryigenga" kuri icyo gitero.

Mu myaka ya vuba ishize, Libya yabaye urubuga rw'ingenzi ku bimukira bashaka kujya i Burayi.

Libya ikomeje kurangwamo umutekano mucye no gucikamo ibice kuva Muammar Gaddafi wategekaga iki gihugu yahirikwa akanicwa mu mwaka wa 2011.

Osama Ali, umuvugizi w'urwego rw'ubutabazi bwihuse, yabwiye ibiro ntaramakuru AFP ko abimukira 120 bari bari mu nzu y'ikirangara ya hangari yatumberewe n'icyo gitero.

Uwufise ububasha kw’isanamu AFP
Image caption Abakozi bo mu rwego rw'ubutabazi bwihuse ubwo bageraga mu gace ka Tajoura kari mu nkengero y'umurwa mukuru Tripoli ahabereye icyo gitero

Yongeyeho ko abandi bantu bashobora kuza gutangazwa ko bishwe kuko abamaze gutangazwa ari "umubare w'ibanze".

Ni nde wagabye icyo gitero?

Leta ya Libya ishyigikiwe n'umuryango w'abibumbye, iyobowe na Minisitiri w'intebe Fayez al-Serra, ishinja umutwe wiyise ingabo z'igihugu cya Libya kuba inyuma y'icyo gitero cy'ejo ku wa kabiri.

Mu itangazo leta yasohoye, yavuze ko ari igitero "cyari cyagambiriwe" kandi "gitumbereye ahantu runaka", ivuga ko ari "icyaha ndengakamere".

Uwo mutwe wiyita ingabo z'igihugu cya Libya uyobowe na Jenerali Khalifa Haftar, umaze igihe urwanira n'abasirikare ba leta ya Libya yemewe n'amahanga muri ako karere kabereyemo icyo gitero.

Ku wa mbere, uwo mutwe wari watangaje ko ugiye gutangira ibitero bikomeye by'indege mu bice by'i Tripoli nyuma yaho "uburyo busanzwe" bw'intambara burangiriye.

Uwufise ububasha kw’isanamu AFP
Image caption Kari agahinda mu maso y'abateraniye hanze y'icyo kigo gifungirwamo abimukira nyuma y'icyo gitero

Ariko umuvugizi w'uyu mutwe yabwiye ibiro ntaramakuru Reuters ko abarwanyi bawo batateye icyo kigo cy'abimukira.

Ishami ry'umuryango w'abibumbye ryita ku mpunzi, HCR, ryatangaje ko "rihangayikishijwe bikomeye" n'amakuru y'ibitero ku kigo cy'abimukira.

Abimukira babarirwa mu bihumbi bagerageza kujya i Burayi bafungirwa mu bigo bya leta nk'iki, akenshi biba biri hafi y'ahabera imirwano.

Ibindi bisa n’ibi