Ubwisanzure bw’itangazamakuru iwacu...

Abanyamakuru b'ikinyamakuru Iwacu mu Burundi mu 2015 Uwufise ububasha kw’isanamu Getty Images
Image caption Abanyamakuru b'ikinyamakuru Iwacu mu Burundi mu 2015 mu kwizihiza umunsi w'ubwisanzure bw'itangazamakuru bagaragaje ko batisanzuye mu kazi kabo

Ubwisanzure bw'itangazamakuru mu bihugu byacu bukwiriye guhera ku kumenya imikorere y'itangazamakuru, ko ari urwego rukwiye kuba rutabogamye kandi ruha ijambo bose. Kutamenya ibi biri mu bituma ubwisanzure bw'itangazamakuru mu Rwanda no mu Burundi bukemangwa.

Ni mu gihe mu Bwongereza hateraniye inama, iteguwe ku nshuro ya mbere, ihuriyemo intumwa zivuye mu bihugu 120 ku isi, yiga ku bwisanzure bw'itangazamakuru ku isi.

Iyi nama yateguwe n'Ubwongereza na Canada ku bwisanzure bw'itangazamakuru ku isi, iragaruka kandi n'uko buhagaze muri Afurika.

Ku rutonde rwa 2019 rw'umuryango w'abanyamakuru batagira umupaka (Reporters Without Borders) rw'uko ibihugu 180 ku isi bikurikirana mu guha ubwisanzure itangazamakuru, u Rwanda ni urwa 155, u Burundi 159.

Ubutegetsi bw'ibi bihugu kenshi buhakana ibi bipimo.

Ubwisanzure bw'itangazamakuru ntibureberwa mu bwinshi bw'ibitangazamakuru, ahubwo mu byo rikora n'uko rikora.

I Burundi

Mu nama ishinzwe umutekano ku isi mu kwezi gushize, komiseri ushinzwe amahoro n'umutekano mu muryango w'ubumwe bw'Afurika yavuze ko mu Burundi hari ibikorwa bibangamira ibinyamakuru byigenga kuri leta.

Ibitangazamakuru mpuzamahanga BBC n'Ijwi ry'Amerika byarahagaritswe, abayobozi n'abaturage babuzwa n'ubutegetsi kubiha amakuru.

Radio RFI ubu nayo itegereje umwanzuro izafatirwa. Ku wa kabiri w'iki cyumweru, ikinyamakuru Iwacu cyihanijwe n'urwego rwa Leta rushinzwe itangazamakuru.

Ibi binyamakuru biregwa na Leta gusebya ubutegetsi, kurwanya ubutegetsi cyangwa guha umwanya abatavuga rumwe nabwo.

Uhagarariye Uburundi mu muryango w'abibumbye yahakanye ibi birego, avuga ko nta bikorwa byo kubangamira uburenganzira bwa muntu cyangwa ubwisanzure bw'itangazamakuru biri mu Burundi.

Mu Rwanda

Umuryango w'abanyamakuru batagira umupaka uvuga ko hari ibikorwa bikomeye byo "kubuzwa gukora inkuru runaka" (censorship) cyangwa "kwibuza kuzikora" (self-censorhip), kuko hashingiwe kuri Jenoside ibinyamakuru binenze Leta cyangwa bihaye umwanya abayinenga bishobora kuregwa "ivangura".

Uyu muryango w'abanyamakuru uvuga ko mu Rwanda ibinyamakuru byinshi bihitamo gukora mu buryo butabangamira ubutegetsi cyangwa bigakoreshwa n'ubutegetsi mu migambi yabwo inyuranye.

Kuva mu 2015 ishami rya BBC Gahuzamiryango ryafunzwe kumvikana kuri FM mu Rwanda kubera amashusho mbarankuru yatambutse kuri BBC TV arimo ibitarashimishije ubutegetsi.

Ariko raporo y'ikigo cy'igihugu gishinzwe imiyoborere yitwa 'Rwanda media barometer' isohoka buri myaka ibiri ivuga ko igipimo kitwa "Ubwisanzure bw'itangazamakuru" mu Rwanda kiri hejuru ku gipimo cya 77%.

Igikenewe

Ni kumenya imikorere y'itangazamakuru, ko ari ijwi ry'impande zose; abaturage ingeri zose, ubutegetsi n'abatavugarumwe nabwo. Ko atari igikoresho cy'uruhande rumwe.

Guha ijambo cyangwa umwanya impande zose bikwiye kumenywa n'impande zose ko ari ihame ntakuka ry'itangazamakuru, bidakwiye kwitwa ko itangazamakuru rirwanya uruhande uru cyangwa ruriya.