Polisi yafashe itsinda ricyekwaho kujyana abakobwa ba Nigeria kuba 'indaya' i Burayi

Icuruzwa ry'abantu Uwufise ububasha kw’isanamu Getty Images
Image caption Abantu batwarwa mu icuruzwa ry'abantu bizezwa imirimo myiza mu bihugu bikize bagerayo bagakoreshwa imirimo batabwiwe, nk'uburaya

Polisi y'Uburayi (Europol) yafashe abantu batandatu bakekwaho kuba mu itsinda riyobowe n'abo muri Finland ryajyanye abakobwa bo muri Nigeria kuba indaya i Burayi.

Iri tsinda rishinjwa gukora ibi bikorwa byo gucuruza abantu mu Burayi mu bihugu birenga 15, nk'uko bivugwa n'ibiro ntaramakuru AFP.

Kuva muri Espagne, aho ukekwaho kuba umuyobozi w'iri tsinda yafatiwe, kugera muri Finland na Sweden ahafatiwe abagore n'abakobwa benshi bazanywe bagakora cyangwa bagakoreshwa ibikorwa byo kwicuruza.

Polisi yafashe hafi miliyoni eshatu z'ama-euro (ni arenga miliyari eshatu z'amafaranga y'u Rwanda) nk'afitanye isano n'ibi bikorwa.

Bahagaritse kandi konti z'abacyekwaho kugira uruhare muri ibi bikorwa ziri mu bihugu 12, banafatira imodoka zihenze, imirimbo n'ama-euro 30,000 muri 'cash', nk'uko polisi y'i Burayi ibitangaza.

AFP ivuga ko iri tsinda ricyekwaho gukora ibi bikorwa byo kujyana abakobwa bagakoreshwa mu buraya i Burayi, ryinjije inyungu igera kuri miliyoni 40 z'ama-euro kuva mu mwaka wa 2010.

Ibihugu binyuranye by'Afurika bivugwamo ikibazo cy'icuruzwa ry'abantu batwarwa bizezwa akazi keza mu bihugu bikize, bagerayo bagakoreshwa imirimo batabwiwe, nk'uburaya.

Ibindi bisa n’ibi