Abanyamulenge barokotse ubwicanyi bwo mu Gatumba mu 2004 basaba ubutabera

Abanyamulenge 160 bapfiriye mu gitero cya Gatumba mu 2004 Uwufise ububasha kw’isanamu BBC GAHUZA
Image caption Abanyamulenge 160 bapfiriye mu gitero cya Gatumba mu 2004

Imiryango y'Abanyamulenge barokotse ubwicanyi bwo mu Gatumba mu gihugu cy'Uburundi irasaba umuryango w'abibumbye ndetse n'ibihugu by'akarere guta muri yombi abakekwaho ubwicanyi bakorewe mu myaka 15 ishize.

Abarokotse ubu bwicanyi bavuga ko bamaze igihe basaba ubutabera ariko kugeza ubu ubutabera bw'Uburundi bukaba nta muntu n'umwe mu baregwa bwari bwata muri yombi.

Bavuga ko ubutabera butinze kuboneka nyuma y'imyaka myinshi babusaba.

Uyu munsi ku wa kabiri, amagana y'Abanyamulenge bari bateraniye i Muhanga mu ntara y'amajyepfo y'U Rwanda mu muhango wo kwibuka ababo bishwe mu mwaka wa 2004.

Baburiye ababo mu inkambi yabo yo mu Gatumba hafi y'umupaka Uburundi busangiye na Kongo igihe yaterwaga, abagera ku 160 bakahasiga ubuzima.

Abarokotse ubu bwicanyi bavuga ko ubutabera butinze kuboneka nyuma y'imyaka myinshi babusaba .

Bwana Ntwari Bukuru ni umunyamategeko akaba n'umwe mu barokotse ubwo bwicanyi.

Avuga ati: "Twatanze ikirego mu butabera bw'Uburundi ndetse batubwira ko bagiye gufata abigambye buriya bwicanyi. Gusa kugeza ubu nta kintu cyakozwe".

Uwufise ububasha kw’isanamu BBC GAHUZA
Image caption Ntwari Bukuru ni umwe mu barokotse ubwo bwicanyi bwa Gatumba mu 2004

Abarokotse ubu bwicanyi bwa Gatumba ubu baratatanye. Bamwe baracyari mu nkambi mu Burundi, abandi bahungiye mu bihugu by'amahanga birimo n'iby'akarere .

Kuba batarabona ubutabera ngo si uko ibimenyetso bishinja ababiciye bitabonetse, ahubwo ngo ubutegetsi bw'Uburundi ndetse n'Umuryango mpuzamahanga bisa n'ibitaraha agaciro ikibazo cy'aba Banyamulenge.

Bwana Ntwari ati: "Turamutse dufite igihugu kituvugira, umuryango w'Ubumwe bw'Afrika, Uburundi bushizemo imbaraga, byibuze bariya bantu batubwira icyatumye bakora biriya bintu ndetse n'abo bafatanije".

Aba Banyamulenge bavuga ko benshi mu bakoze ubu bwicanyi bataramenyekana kuko nta byinshi byakozwe mu kubashakisha.

Gusa bagashimangira ko hari n'abigambye uruhare muri ubu bwicanyi nyamara batakurikiranywe .

Bavuga ko barimo n'abafite imyanya ikomeye mu butegetsi bw'Uburundi, iyi ikaba impamvu ituma kugeza ubu bakidegembya.