Icyorezo Ebola: Mu Burundi batangiye gukingira ‘abahangana nayo’

Batangiye gukingira abo ku mupaka wa Gatumba Uwufise ububasha kw’isanamu WHO
Image caption Batangiye gukingira abo ku mupaka wa Gatumba

Ishami ry'umuryango w'abibumbye ryita ku buzima,OMS, ryatangaje ko mu Burundi abakozi mu by'ubuzima n'ababafasha ku mipaka batangiye guhabwa urukingo rwa Ebola.

Mu ntangiriro z'iki cyumweru inkingo za Ebola zagejejwe mu Burundi.

Abakozi bo ku mupaka wa Gatumba - hafi ya Repubulika ya Demokarasi ya Congo aho Ebola imaze guhitana abantu barenga 1,800 mu gihe cy'umwaka - nibo bahereweho bahabwa urukingo.

Aba bakozi mu by'ubuzima n'abandi bo ku mupaka bari guterwa urukingo rwa rVSV-ZEBOV rukiri mu igeragezwa. Biteganyijwe ko abagera ku 4,300 ari bo bazakingirwa.

Mu itangazo ryayo, OMS ivuga ko "nubwo uru rukingo rukiri mu igeragezwa kandi rutemerewe no kugurishwa, rwagaragaje ko rukora neza kandi rwarinze abantu kwandura Ebola muri Afurika y'iburengerazuba".

Uru rukingo rwakozwe n'ikigo gikora imiti cyo muri Amerika kitwa Merck, rwageragejwe bwa mbere muri Guinea mu 2015 nk'uko bivugwa n'uhagarariye OMS mu Burundi Dr Kazadi Mulombo.

Agira ati: "Gukingira abakozi mu buzima n'abandi bari guhangana na Ebola ni intambwe ikomeye mu kwitegura gukumira iki cyorezo".

Kugeza ubu indwara ya Ebola ntabwo iragera mu Burundi, gusa kuba iki gihugu gihana imbibi na Congo - ahavugwa iyi ndwara - bishyira aka gace mu kaga ko kuba yahagera.

Mu cyumweru gishize Uganda nayo yatangiye igerageza ry'urukingo rwa kabiri rwa Ebola rwakozwe n'indi kompanyi ikora imiti yo muri Amerika.

Muri iki cyumweru kandi abahanga batangaje ko imiti ibiri ya Ebola imaze iminsi mu igerageza muri Congo ivura abarwayi bayo ku kigero cya 90%.