Umunya-Uganda Winnie Byanyima yagizwe umuyobozi w'ishami rya ONU ryo kurwanya SIDA

Winnie Byanyima yavuze ko azi neza akazi gakomeye kamutegereje Uwufise ububasha kw’isanamu Getty Images
Image caption Winnie Byanyima yavuze ko azi neza akazi gakomeye kamutegereje

Umunya-Uganda Winnie Byanyima uyobora umuryango mpuzamahanga urwanya ubukene (Oxfam), yagenwe nk'ugiye kuyobora ishami ry'umuryango w'abibumbye rirwanya icyorezo cya SIDA (UNAIDS).

Itangazo rya UNAIDS rigira riti: "Madamu Byanyima azanye ubunararibonye bwinshi ndetse n'umuhate mu kugenzura ububasha bwa za leta, imiryango mpuzamahanga, urwego rw'abikorera ndetse n'imiryango ya 'société civile', mu rwego rwo guca burundu icyorezo cya SIDA ku isi".

Umunyamabanga mukuru wa ONU, Antonio Guterres, yavuze ko igenwa rya Madamu Byanyima ryagezweho "biciye mu ishakisha ridaheza kandi risesuye".

Madamu Byanyima wahoze ari umudepite ndetse akaba yarize iby'ubumenyi bwo gukora no gukanika indege n'ibyogajuru, asimbuye kuri uwo mwanya Michel Sidibé wagizwe Minisitiri w'ubuzima wa Mali.

Mu itangazo Madamu Byanyima yasohoye, yagize ati: "Nakiranye icyubahiro cyinshi kuba ngiye mu muryango UNAIDS nk'umuyobozi mukuru, muri iki gihe cy'ingenzi cyo guhangana na [virusi ya] HIV".

Yongeyeho ati: "Gucika kwa SIDA nk'icyorezo cyibasiye ubuzima bitarenze umwaka wa 2030 ni intego isi ishobora kugeraho, ariko ntabwo nirengagije imbogamizi ziri imbere".

Madamu Byanyima w'imyaka 60 y'amavuko, yatangaje ubutumwa ku rubuga nkoranyambaga rwa Twitter avuga ko yakiranye iyo mirimo mishya "kwicisha bugufi, umurava no kwizera".

Madamu Byanyima yashakanye na Kizza Besigye, umwe mu bakuru b'abatavuga rumwe n'ubutegetsi bwa Uganda, bakaba bafitanye umwana umwe w'umuhungu.

Mu gihe cy'imyaka irindwi, yabaye umuyobozi ushinzwe iby'uburinganire bw'abagabo n'abagore (gender) mu ishami rya ONU ryita ku iterambere (UNDP), mbere yuko aba umuyobozi wa Oxfam muri 2013.

Yanakoreye umuryango w'ubumwe bw'Afurika mu mushinga wita ku burenganzira bw'abagore mu gufasha kugabanya kwibasirwa kwabo na SIDA ku mugabane w'Afurika.

Ibindi bisa n’ibi