Igisasu cyahitanye abantu 63 mu bukwe bw'i Kabul muri Afghanistani

Umutwe wiyita leta ya kisilamu wigambye iki gitero Uwufise ububasha kw’isanamu AFP
Image caption Umutwe wiyita leta ya kisilamu wigambye iki gitero

Hari kuba ibikorwa byo gushyingura abahitanywe n'igisasu cyaturikiye mu bukwe bwaberaga i Kabul mu murwa mukuru wa Afghanistani kigahitana abantu 63 naho abarenga 180 bagakomereka.

Umutwe wiyita leta ya kisilamu (IS) wigambye icyo gitero.

Cyabaye ejo ku wa gatandatu nyuma gato ya saa yine na 40 z'ijoro ku isaha y'i Kabul, mu gace k'uburengerazuba bw'uyu mujyi gatuwe cyane n'abayisilamu b'aba Shia.

Perezida Ashraf Ghani wa Afghanistani yamaganye icyo gitero yise "icya kinyamaswa". Yanenze umutwe w'Abatalibani yavuze ko "wahaye urubuga ibyihebe".

Umutwe w'Abatalibani wahakanye kugira uruhare muri icyo gitero ndetse uracyamagana.

Uwufise ububasha kw’isanamu EPA
Image caption Abaganga bo muri Afghanistani binjiza inkomere mu bitaro

Umutwe wa IS watangaje ko umwe mu barwanyi bawo yiturikirijeho igisasu "ahateraniye imbaga".

Wongeyeho ko abandi barwanyi bawo "baturikije imodoka yari iparitse yapakiwemo ibiturika" ubwo abakora mu nzego z'ubutabazi bwihuse bahageraga.

Mu bihe bishize, intagondwa z'abayisilamu b'aba Sunni, barimo n'Abatalibani n'umutwe wa IS, bakomeje kugenda bibasira ba nyamucye b'aba Shia Hazara muri Afghanistani na Pakistani.

'Abageni bahahamutse'

Umusore wakoze ubukwe wavuze ko yitwa Mirwais, yabwiye televiziyo yaho ati: "Umuryango wanjye, umugeni wanjye bahungabanye, nta nubwo bashobora kuvuga. Umugeni wanjye buri kanya aracika intege akitura hasi".

"Napfushije umuvandimwe wanjye, napfushije inshuti zanjye, napfushije bene wacu. Ntabwo nzongera kwishima ukundi mu buzima bwanjye".

"Ntabwo nshobora kujya mu mihango yo gushyingura, ndikumva mfite intege nke cyane ... Ndabizi ko uyu utazaba umubabaro wa nyuma ku Banya-Afghanistani, umubabaro uzakomeza".

Se w'umugeni (sebukwe) yabwiye ibitangazamakuru byaho ko muri icyo gitero yapfushije abantu 14 bo mu muryango we.

Uwufise ububasha kw’isanamu Reuters
Image caption Hari kuba imihango yo gushyingura i Kabul nyuma y'icyo gitero

Minisitiri w'ubutegetsi bw'igihugu wa Afghanistani yemeje uwo mubare w'abishwe hashize amasaha icyo gitero kibaye.

Amafoto yo ku mbuga nkoranyambaga agaragaza imirambo inyanyagiye mu cyumba ('salle') ubwo bukwe bwaberagamo, mu gihe ameza n'intebe byari byahirimye.

Aha muri Afghanistani, ubukwe bukunze gutahwa n'abashyitsi babarirwa muri za magana, bagateranira muri za 'salles' aho akenshi abagabo bicara ukwabo batandukanye n'abagore n'abana.

Mohammad Farhag wari watashye ubwo bukwe yavuze ko yari anyarukiye aho abagore bicara ubwo yumvaga ikintu giturika bikomeye mu gice cyicaramo abagabo.

Yabwiye ibiro ntaramakuru AFP ati: "Buri muntu wese yirukiye hanze atera hejuru kandi arira".

Uwufise ububasha kw’isanamu Reuters
Image caption Abantu barenga 180 bakomerekeye muri icyo gitero

"Mu gihe cy'iminota igera hafi kuri 20, 'salle' yari yuzuyemo umwotsi. Hafi buri muntu wari wicaye mu gice cy'abagabo yapfuye cyangwa yakomeretse. Ubu, nyuma y'amasaha abiri igisasu gituritse, baracyakura imirambo muri 'salle'".

Sayed Agha Shah, umuseriveri ('serveur') wari uri muri ubwo bukwe, yavuze ko "buri muntu wese yari arimo kwiruka" nyuma yo guturika kw'icyo gisasu.

Yongeyeho ati: "Benshi mu baseriveri bagenzi banjye bapfuye cyangwa barakomereka".

Ibi byari bisanzwe?

Iki gisasu gituritse hashize iminsi 10 gusa ikindi gisasu giturikiye hanze y'ikigo ('station') cya polisi aha mu murwa mukuru Kabul kigahitana abantu 14 naho abandi hafi 150 bagakomereka.

Icyo gihe umutwe w'Abatalibani wavuze ko ari wo wagabye icyo gitero.

Ku wa gatanu, umuvandimwe w'umukuru w'Abatalibani Hibatullah Akhundzada yishwe n'igisasu cyari cyatezwe mu musigiti hafi y'umujyi wa Quetta wo muri Pakistani.

Nta mutwe kugeza ubu urigamba icyo gitero cyo ku wa gatanu.

Umukozi wo mu biro by'ubutasi by'Abatalibani yabwiye BBC ko Hibatullah Akhundzada yateganyaga kwitabira amasengesho ku wa gatanu muri uwo musigiti, kandi ko bishoboka ko ari we wari ugambiriwe.

Ubushyamirane bumaze igihe bwariyongereye mu gihugu, nubwo Abatalibani n'Amerika - ifite abasirikare babarirwa mu bihumbi muri iki gihugu - bivugwa ko bari hafi gutangaza ko bageze ku masezerano y'amahoro.

Uwufise ububasha kw’isanamu EPA
Image caption Abo mu miryango ya ba nyakwigendera bateraniye hanze y'ibitaro bahangayitse

Biteganywa ko ayo masezerano yaba akubiyemo ko Amerika izagenda ikura ingabo zayo mu gihugu mu byiciro, Abatalibani nabo bakemerera Amerika ko iki gihugu kitazaba indiri y'imitwe y'abahezanguni yibasira Abanyamerika.

Kuva Abatalibani bakurwa ku butegetsi mu mwaka wa 2001 n'urugaga rw'ingabo z'amahanga ziyobowe n'Amerika, ubu Abatalibani bagenzura igice kinini cy'igihugu kurusha mu kindi gihe icyo ari cyo cyose cya nyuma y'uwo mwaka.

Ibindi bisa n’ibi