Virginia, USA: Abakundana barashaka guca itegeko ribasaba kuvuga ubwoko bwabo

Brandyn Churchill na fiancée we Sophie Rogers ntibarabona icyangombwa cyo gushyingirwa kuko banze kuvuga ubwoko bwabo Uwufise ububasha kw’isanamu RANDYN CHURCHILL/SOPHIE ROGERS
Image caption Brandyn Churchill na fiancée we Sophie Rogers ntibarabona icyangombwa cyo gushyingirwa kuko banze kuvuga ubwoko bwabo

Muri Leta ya Virginia muri Amerika abakundana mbere yo gushyingirwa basabwa kuvuga ubwoko bwabo, bamwe muri bo ubu batanze ikirego cyo guca aya mategeko.

Abagiye gushakana basabwa guhitamo mu rutonde rurerure rw'amoko, aya moko ahanini agendanye n'inkomoko yabo.

Umunyamategeko Victor Glasberg yatanze ikirego ahagarariye 'couples' eshatu z'abakundana, kivuga ko ibi bintu bihabanye n'itegeko nshinga kandi birimo irondamoko.

Imwe muri izi 'couples' ya Brandyn Churchill w'imyaka 27 na Sophie Rogers w'imyaka 23 bo muri iyi Leta ya Virginia, bavuga ko bizeye gutsinda mbere y'uko bashyingirwa mu kwezi gutaha.

Hagati aho bakaba babaye basabye urukiko ko nta wugomba kubabuza gushyingiranwa kuko banze kuvuga ubwoko bwabo.

Izindi 'couples' ebyiri zareze ni iza Ashley Ramkishun na fiancé we Samuel Sarfo ndetse na Amelia Spencer n'umusore bakundana (fiancé) Kendall Poole.

Mu birego byabo, bavuga ko bashaka gushyingirwa hano muri Virginia ariko "batabajijwe amoko yabo kugira ngo bahabwe icyangombwa cyo gushyingirwa".

Sophie Rogers yabwiye BBC ko we n'umukunzi we biyemeje kubana mu mpeshyi y'umwaka ushize. Ko muri Virginia uba ufite iminsi 60 yo gusaba icyangombwa cyo gushyingirwa mbere yo kubikora.

Ati: "Twasabye iki cyangombwa mu kwezi kwa cyenda. Ucyandika yagerageje kucyandika atujuje ahandikwa ubwoko ariko mudasobwa ntizibyemera".

Uwufise ububasha kw’isanamu ASHLEY RAMKISHUN
Image caption Samuel Sarfo n'umukunzi we Ashley Ramkishun bamaze imyaka 10 baba muri Virginia

Umukunzi we Churchill ati: "Amagambo y'irondamoko ntakwiriye mu kinyejana cya 21. Twavuze ko tutabishaka turigendera".

Virginia ni imwe muri leta umunani muri Amerika aho amategeko asaba abantu kuvuga ubwoko bwabo mbere yo gushyingirwa.

Umunyamategeko Glasberg avuga ko iyi ngingo ishingiye ku itegeko ryo mu 1924 ryo muri iyi leta "rigenga amoko", iri ngo ryahoze ryitwa "itegeko ryo kubungabunga ubusugire bw'ab'uruhu rwera".

Bwana Glasberg w'imyaka 74, yabwiye BBC ko nawe yaryibajijeho kuva kera, ko mu 1981 ubwo yashyingirwaga yasabye ko aha babaza abantu ubwoko bahasimbuza "ubumuntu" bakamutsembera.

Madamazera Ashley Ramkishun w'imyaka 26, yavuze ko we n'umukunzi we bashimye kurega ngo ibi bihinduke bamaze kwimwa icyangombwa cyo gushyingirwa batavuze ubwoko bwabo.

Ati: "Ntabwo turi ubwoko turi abantu".

Umuvugizi w'ibiro bya guverineri yavuze ko Guverineri Northam ari kugerageza guca ivangura ryose rishingiye ku moko.

Ati: "Aherutse gushyiraho komisiyo yo kwiga ku magambo y'ivangura ari mu itegeko rya Virginia".