Ikiganiro ku muco wo kudahana mu Burundi
Ntibishobora gukina mu cuma cawe

Imvo n'Imvano ku muco wo kudahana mu Burundi

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki 26 z'ukwezi kwa 10 mu 2019. Dufatiye ku munsi mu Burundi bibutse ku wa mbere w'iki cyumweru, ku nshuro ya 26, Melchior Ndadaye, umukuru w'igihugu wa mbere watowe n'abanyagihugu mu mwaka w'i 1993 akicwa amaze amezi 3 gusa ari ku butegetsi, Imvo n'Imvano y'uyu munsi yahisemo gusubiza amaso inyuma ireba umuco wo kudahana mu Burundi ku bwicanyi bwakorewe abategetsi n'abaturage b'u Burundi kuva icyo gihugu kibonye ubwigenge muri 1962.

Ni muri urwo rwego abagore b'abategetsi bicanywe na Melchior Ndadaye, bashyinze ishyirahamwe bise AVOD ( Association des Veuves et des Orpherins pour leurs droits ) kugira ngo ribarenganure, babone ubutabera kandi babone n'indishyi z'akababaro. Abo bagore bavuga ko batangiye mu 2002 ari batandatu none ubu bamaze kwongeramo n'abandi bapfakazi babuze ababo mu mwaka wa 1965, umwaka wa 1988, n'abandi, kuburyo ubu bamaze kugera ku barenga 100.

Amateka aragaragaza ko u Burundi buri mu bihugu by'Afurika biri ku isonga mu kugira umubare munini w'abategetsi n'abaturage bishwe kubera impamvu za politiki kuva icyo gihugu gitangiye inzira yo guharanira ubwigenge. Amaraso y'abanyapolitiki yatangiye kumeneka mbere gato y'ubwigenge ubwo hagandagurwaga Umushikirangoma wa mbere Louis Rwagasore ku itariki ya 13 z'ukwezi 10, mu 1961. Yari amaze iminsi 25 gusa ari Umushikirangoma - ni ukuvuga Minisitiri w'intebe.

Uwamukurikiye mu kumara igihe gito ku butegetsi kandi yaratowe n'abaturage ni Melchior Ndadaye wamaze iminsi 103 gusa ku butegetsi. Ndadaye yicanywe n'abandi bategetsi bashoboraga kumusimbura ku butegetsi ukurikije uko itegeko nshinga ry'u Burundi ryavugaga.

Abakoze ubwo bwicanyi cyane cyane n'igisirikare cy'icyo gihugu ariko n'abanyapolitiki bari babifitemo uruhare rukomeye.

Urubanza ruvugwa cyane ubu n'urwa Melchior Ndadaye na bagenzi be. Inzira yo kumenya ababishe na n'ubu iracyakataje. Ku itariki 25 z'ukwezi kwa 11 k'umwaka ushize, hatawe muri yombi abasirikare 4 b'intwazangabo bahoze mu gisirikare cya kera cy'u Burundi FAB, baregwa uruhare bagize mu rupfu rwa Melchior Ndadaye. Kw'itariki 8 z'uku kwezi kwa 10 nibwo bashyikirijwe urukiko rw'ikirenga ubwo haba hatangijwe urubanza rwa kabiri.

Urubanza rwa mbere rwari rwatangijwe mu 1998 ariko ubushinjacyaha n'ababuranira ababuze ababo, ntibishimiye imyanzuro y'urukiko rw'ikirenga, rwaciye urubanza ku itariki 14 z'ukwa 5 mu 1999. Icyo gihe mu bantu 79 baburanishwaga, hari bane bakatiwe igihano cyo gupfa, abandi bakatirwa igifungo cy'imyaka iva kuri 20 kumanuka, hari n'abandi bagizwe abera. Muri abo bagizwe abera harimo uwari Umushikiranganji w'ingabo, Colonel Ntakije Charles, uwari umukuru w'ingabo nyakwigendera Colonel Jean Bikomagu, uwari umukuru w'inkambi Muha, Lt Col Nibizi Isaïe na François Ngeze wajyanywe kuri Radio y'igihugu akavuga ko habaye ihirikwa ry'ubutegetsi. Ubwo ubushinjacyaha n'ababuranira abiciwe bahise bajurira mu kwezi gukurikiyeho, ariko ubujurire bwabo na n'ubu ntiburumvwa.

Leta y'u Burundi ubu rero, ivuga ko umugambi wo kwica Perezida Melchior Ndadaye n'abandi bategetsi, wacuzwe na Pierre Buyoya wahise afata ubutegetsi. Ibyo bikaba byaratumye ubushinjacyaha butangiza urubanza bundi bushya kuko busanga hari abasirikare bakuru bataciriwe imanza kandi baragize uruhare muri ubwo bwicanyi. Petero Buyoya ari ku mwanya wa mbere ku rutonde rw'abantu 17 rwasohowe n'umushinjacyaha w'u Burundi mu kwezi kwa 11 k'umwaka ushize.

Petero Buyoya, ubu aba mu buhungiro mu mahanga, akaba agaragara mu bikorwa binyuranye by'umuryango w'ubumwe bw'Afurika nk'umugishwanama w'inararibonye mu by'ubutegetsi, arahakana ibyo aregwa na leta iri ku butegetsi.

Maître Yerim Tiam, Umufaransa uri mu bunganira Petero Buyoya mu mategeko, muri iki cyumweru yabwiye BBC Gahuzamiryango ko umukiriya we, nubwo atahamagajwe n'ubucamanza bw'u Burundi, ariko bunamuhamagaye atabwitaba kubera impamvu z'umutekano. Aravuga ko yiteguye kujya kuvugira umurirya we ndetse ngo yarabigerageje ariko avuga ko leta y'u Burundi yanze kumuha uburenganzira bwo kwinjira muri icyo gihugu.

Imvo n'Imvano ya none irabaza igitera umuco wa kudahana mu Burundi. Irakomeza kubaza niba abaharanira kurenganurwa bazarenganurwa. Ese ni ryari ukuri kuzagaragara ku bwicanyi bwaranze u Burundi?

Abatumire bacu ni Adèle Ahishakiye, umukuru w'ishyirahamwe AVOD, Maître Fabien Segatwa, umunyamategeko uburanira imiryango y'abiciwe hamwe rero na Fabien Banciryanino, umushingamateka wigenga.

Ikiganiro mwagiteguriwe na Félin Gakwaya.

Ibindi bisa n’ibi