Abu Bakr al-Baghdadi: Amerika 'yagabye igitero ku mukuru w'umutwe wa IS'

Hari amakuru ataremezwa yuko ingabo z'Amerika zagabye igitero kuri Abu Bakr al-Baghdadi, umukuru w'umutwe wa IS Uwufise ububasha kw’isanamu AFP
Image caption Hari amakuru ataremezwa yuko ingabo z'Amerika zagabye igitero kuri Abu Bakr al-Baghdadi, umukuru w'umutwe wa IS

Ingabo za Leta Zunze Ubumwe z'Amerika zagabye igitero ku mukuru uri mu buhungiro w'umutwe wiyita leta ya kisilamu (IS), nkuko bivugwa n'ibitangazamakuru byo muri iki gihugu.

Ibivugwa ko hagabwe igitero kuri Abu Bakr al-Baghdadi ntabwo byari byemezwa.

Ibiro bya perezida w'Amerika bya White House byavuze ko Perezida Donald Trump aza gutangaza "itangazo rikomeye" kuri iki cyumweru, ariko nta yandi makuru arenzeho byatanze.

Mbere yaho, Bwana Trump yari yatangaje ku rubuga nkoranyambaga rwa Twitter ubutumwa burimo kuzimiza agira ati: "Hamaze kuba ikintu gikomeye cyane!"

Mu magambo y'abategetsi batatangajwe amazina yasubiwemo n'ibitangazamakuru bitandukanye byo muri Amerika, bavuze ko ingabo z'Amerika zagabye igitero kuri uwo mukuru wa IS mu majyaruguru ashyira uburengerazuba bwa Syria.

Umutegetsi wo muri Amerika wavuganye n'ibiro ntaramakuru Reuters yavuze ko habaye igitero, ariko ntiyemeza ibiri guhwihwiswa ko Baghdadi yishwe.

Mu bihe byashize, uyu mukuru wa IS yagiye avugwa ko yishwe ariko atari byo.

Ibiro bya White House ntabwo biremeza ko habaye igitero cyangwa se icyo cyaba cyagezeho.

Ikinyamakuru Newsweek, gisubiramo amagambo y'abantu batatangajwe umwirondoro, cyatangaje ko igitero cyagabwe n'abasirikare kabuhariwe nyuma yo kubona "amakuru y'ubutasi yo kwizerwa".

Nyuma y'ayo makuru, ikigo gikorera mu Bwongereza kigenzura ibijyanye n'uburenganzira bwa muntu muri Syria cyitwa Syrian Observatory for Human Rights, cyatangaje ko habayeho kurasa kw'indege ya kajugujugu bigahitana abantu icyenda hafi y'icyaro mu ntara ya Idlib muri Syria.

Icyo kigo cyongeyeho ko aho hantu hazwiho kuba "imitwe ifitanye isano n'umutwe wiyita leta ya kisilamu".

Biteganyijwe ko Bwana Trump ageza ijambo ku Banyamerika kuri iki cyumweru, ahagana ku isaha ya saa cyenda ku isaha yo mu Rwanda no mu Burundi.

Abu Bakr al-Baghdadi ni muntu ki?

Uyu mukuru wa IS avugwa ko ari we muntu ushakishwa cyane kurusha abandi ku isi.

Mu kwezi kwa cumi mu 2011, Amerika yatangaje ku mugaragaro ko ari "ukora iterabwoba" ndetse ishyiraho igihembo cya miliyoni 25 z'amadolari ku watanga amakuru yatuma afatwa cyangwa akicwa.

Baghdadi azwiho kuba umuntu ukora ibintu ku murongo yabyitondeye cyane kandi akaba umuhanga mu gutegura urugamba rwa nta mpuhwe.

Yavukiye hafi ya Samarra, mu majyarurugu ya Baghdad - umurwa mukuru wa Iraq - mu mwaka wa 1971. Izina rye ry'ukuri ni Ibrahim Awad al-Badri.

Amakuru avuga ko yari umukuru w'umusigiti muri uwo mujyi mu gihe urugaga rw'ingabo z'amahanga ziyobowe n'Amerika zagaba ibitero kuri Iraq mu mwaka wa 2003.

Bamwe bemeza ko nubundi yari asanzwe ari intagondwa igendera ku mahame akaze y'idini ya kisilamu no ku butegetsi bw'uwari Perezida wa Iraq, Saddam Hussein.

Abandi bavuga ko yagize amatwara akaze mu gihe cy'imyaka ine yamaze afungiye muri gereza ya Camp Bucca, iyi ikaba yari gereza yari mu majyepfo ya Iraq aho abakuru benshi ba al-Qaeda bari bafungiye.

Mu mwaka wa 2010, yamenyekanye nk'umukuru wa al-Qaeda muri Iraq, iki gice kikaba ari kimwe mu byihuje na IS, ndetse aza kumenyekana cyane ubwo yageragezaga kwihuza n'umutwe wa al-Nusra Front muri Syria.

Muri uyu mwaka, umutwe wa IS wasohoye videwo y'umugabo ivuga ko ari Baghdadi. Mbere yaho, ntabwo yari bwongere kugaragara guhera mu mwaka wa 2014, ubwo yatangarizaga mu mujyi wa Mosul iremwa ry'"ubutegetsi bwa kisilamu" mu bice bya Syria na Iraq.