Tanzania: Umunyarwenya arakurikiranywe kuko yahinduranyije umutwe we n'uwa Magufuli

Idris Sultan n umunyarwenya ukomeye muri Tanzania Uwufise ububasha kw’isanamu Idris Sultan
Image caption Idris Sultan ni umunyarwenya ukomeye muri Tanzania

Umunyarwenya Idris Sultan yarekuwe by'agateganyo mu gihe akurikiranyweho gushyira ku mbuga nkoranyambaga ifoto yahinduranyije umutwe we n'uwa Perezida Magufuli nk'uko umunyamategeko we yabibwiye BBC.

Idris Sultan yahamagajwe kuwa gatatu ahatwa ibibazo na polisi ndetse arafungwa ariko aza kurekurwa atanze ingwate nk'uko Benedict Alex Ishabakaki umunyamategeko we abivuga.

Uyu munsi kuwa gatanu mu gitondo arongera kwitaba polisi.

Bwana Ishabakaki avuga ko umukiliya we ari gukurikiranwa hagendewe ku itegeko, ritavugwaho rumwe, ry'ibyaha bikorerwa kuri mudasobwa.

Iri tegeko ribuza gukoresha mudasobwa 'wiyitirira umuntu' cyangwa utangaza amakuru atari ukuri.

Idris Sultan, wigeze gutsindira irushanwa rya Big Brother Africa, kuwa gatatu yatangaje amafoto abiri yahinduranyije umutwe we n'uwa perezida wa Tanzania.

Ifoto imwe yerekana umutwe wa Bwana Magufuli uri ku gihimba gisa n'icya Sultan.

Indi foto iriho umutwe w'uyu munyarwenya uri ku mubiri wa Bwana Magufuli yambaye isuti kandi yicaye mu ntebe ya perezida iriho ikirango cy'igihugu.

Kuri aya mafoto yanditseho mu giswahili amagambo asobanura ngo: "Twahinduranyije inshingano uyu munsi kugira ngo yishimire isabukuru ye mu mahoro".

Kuwa kabiri, Perezida Magufuli yari yujuje imyaka 60 y'amavuko.

Ibindi bisa n’ibi