Ubutasi kuri telefone: Kuva kuri WhatsApp byatanga umutekano kurushaho?

Faustin Rukundo, Umunyarwanda utuye i Leeds mu Bwongereza uri mu batavuga rumwe n'ubutegetsi bw'u Rwanda, avuga ko yakozweho ubutasi kuri WhatsApp
Image caption Faustin Rukundo, Umunyarwanda utuye i Leeds mu Bwongereza uri mu batavuga rumwe n'ubutegetsi bw'u Rwanda, avuga ko yakozweho ubutasi kuri WhatsApp

Mu gihe WhatsApp yemeje ko 'software' yayo yakoreshejwe mu gushyira uburyo bwo kuneka muri za telefone, benshi bari gutekereza ku kuba basiba 'app' yayo muri telefone, ntibazongere kohererezanya ubutumwa, ariko impuguke zivuga ko uwo atari wo muti.

Habayeho kugira uburakari no guhangayika mu bihugu byinshi birimo nk'Ubuhinde, nyuma yaho WhatsApp yemeje ko bamwe mu bayikoresha bibasiwe n'uburyo bwo kuneka.

Bamwe muri icyo gihugu batunze urutoki leta, bayishinja ko ari yo yihishe inyuma y'ubwo butasi, bitewe nuko ikigo gishinjwa ubwo butasi cya NSO Group cyo muri Israel, amakuru avuga ko kigurisha ubwo buryo bw'ubutasi kuri za leta.

Faustin Rukundo, Umunyarwanda utuye i Leeds mu Bwongereza uri mu batavuga rumwe n'ubutegetsi bw'u Rwanda, avuga ko na we yakozweho ubutasi kuri WhatsApp.

Leta y'u Rwanda yavuze ko itazasubiza ku birego byuko yaba ibiri inyuma.

WhatsApp yarenze mu rukiko iyo kompanyi yo muri Israel kuri ibyo birego byo gukora ubutasi. Iyo kompanyi ihakana ibyo birego yivuye inyuma.

Leta y'Ubuhinde nayo yahakanye ivuga ko nta ruhare ifitemo.

Bamwe mu bakoresha urubuga rwa WhatsApp bamaze igihe bareba ubundi buryo bundi bakoresha butari WhatsApp, burimo nka Signal cyangwa Telegram bivugwa ko bwo bufite umutekano kurushaho.

Ariko impuguke zivuga ko WhatsApp, ikoreshwa n'abantu miliyari imwe na miliyoni 500 mu bihugu 180 ku isi muri bo miliyoni 400 bakaba bari mu Buhinde, ari yo iri kugirwaho ingaruka n'uko kwinjirirwa n'abatasi kandi atari yo yabiteye na busa.

Nubwo ubusembwa mu buryo bwayo bwo kwitaba kuri video byahaye inzira ubwo butasi bukinjira abayikoresha nta ruhare babigizemo, kera kabaye byageze no muri telefone yose kubera ibyuho mu buryo bw'imikorere bwa telefone.

Vinay Kesari, umucamanza w'impuguke mu by'ubuzima bwite, yagize ati: "Ibyuho ubwo butasi bwaciyemo byari ku rwego rw'imikorere [ya telefone], haba muri Android cyangwa muri Apple".

Prasanto K Roy, umwanditsi ku ikoranabuhanga, yagize ati: "Niba hari uburyo bw'ubutasi muri telefone yawe, buri kintu cyose gisomeka cyangwa n'icyo ari cyo cyose kinyuze muri camera yawe cyangwa mikoro ('micro') kiba kiri mu kaga".

Uwufise ububasha kw’isanamu Getty Images
Image caption WhatsApp ni uburyo bukoreshwa cyane mu Buhinde mu kohererezanya ubutumwa

WhatsApp yiyamamaza ivuga ko ari uburyo "bufite umutekano" bwo kohererezanya ubutumwa kuko ubutumwa buba bufunze ku mpande zombi.

Ni ukuvuga bukwiye kugaragarira gusa mu buryo busomeka kuri telefone y'ubwohereje cyangwa ubwakiriye.

Bwana Roy yongeyeho ati: "Muri ibi byabaye [by'ubutasi kuri WhatsApp], ntabwo bisaba ko ubutumwa bufunze ku mpande zombi cyangwa budafunze - igihe cyose ubwo butasi buri muri telefone yawe, abinjira mu mabanga ('hackers') bashobora kureba icyo ari cyo cyose kiri muri telefone yawe nkuko nawe ukibona".

"Kuri uru rwego, biba byamaze kujya ku karubanda kandi bisomeka".

"Ni nkaho uba wafunguye telefone yawe ukayitanga. Ariko by'ingenzi kurushaho, uku kwinjirirwa [kwa WhatsApp] kugaragaza ukuntu imikorere ya telefone [operating systems] irimo ibyuho".

Byinshi mu biganiro by'abakoresha WhatsApp biri kuvuga ku kuba bayivaho bakimukira ku bundi buryo bwo guhanahana ubutumwa, by'umwihariko uburyo bwa Signal, buzwiho kugira umubare w'ibanga.

Ariko se ibyo bivuze ko telefone yawe yaba irinzwe ubutasi kurushaho?

Izo mpuguke zivuga ko atari ko bimeze neza.

Bwana Kesari yagize ati:

"Ku buryo bwa Signal, harimo ikindi cyiciro cyongeyeho cyo gutanga umucyo kuko batanga umubare wabo w'ibanga ('code') bawuha rubanda.

"Rero ubaye uri umuntu w'inzobere mu bya 'codes', kandi kompanyi ikavuga ko yakemuye ikibazo cyo kwinjirirwa, ushobora kugera kuri iyo 'code' nawe ukirebera".

"Ariko ibyo ntibivuze ko iyo 'app' ifite ubundi buryo burenzeho bwo kurinda ibitero nk'ibyo".

Prasanto K Roy yabwiye BBC ko icyo gitero cy'ubutasi cyarenze WhatsApp gusa.

Uwufise ububasha kw’isanamu Getty Images
Image caption WhatsApp ni bumwe mu buryo bukoreshwa cyane ku isi bwo kohererezanya ubutumwa bw'ako kanya

Bwana Roy yagize ati: "Ku bantu bafite telefone zagezweho n'ubwo butasi, amakuru yabo yose yagiye mu kaga - atari ayo kuri WhatsApp gusa".

Yongeyeho ko kugeza ubu, nta mpamvu ihari yo kwemeza ko WhatsApp "ifite umutekano mucye" ugereranyije n'izindi 'apps'.