Abahoze ari abakozi ba Twitter bashinjwa gukorera ubutasi Arabie Saoudite

Twitter Uwufise ububasha kw’isanamu Getty Images

Babiri bahoze ari abakozi ba kompanyi ya Twitter barezwe mu rukiko rwo muri Amerika bashinjwa kuba ba maneko ba Arabie Saoudite.

Ibyo birego byatangajwe ejo ku wa gatatu mu rukiko rw'i San Francisco.

Bikubiyemo ko ba maneko ba Arabie Saoudite bashatse amakuru bwite y'abakoresha urubuga rwa Twitter barimo n'abanenga leta y'icyo gihugu.

Inyandiko z'urukiko zivuga amazina y'abo baregwa, ko ari Ahmad Abouammo, w'Umunyamerika, na Ali Alzabarah, ukomoka muri Arabie Saoudite.

Undi muntu wa gatatu, Ahmed Almutairi - umuturage wa Arabie Saoudite, na we ashinjwa gukora ubutasi.

Ikinyamakuru The New York Times kivuga ko ubu ari ubwa mbere abaturage ba Arabie Saoudite barezwe gukora ubutasi imbere muri Amerika.

Ibirego biteye bite?

Ibirego bivuga ko Bwana Almutairi yakoze nk'umuhuza hagati y'abo bakozi babiri ba Twitter n'abategetsi ba Arabie Saoudite.

Ahmad Abouammo yagaragaye mu rukiko rwa Seattle ejo ku wa gatatu ndetse akomeza kuba afunzwe mu gihe hategerejwe irindi buranishwa riteganyijwe kuba ejo ku wa gatanu.

Anashinjwa gukora inyandiko mpimbano no kuvuga amagambo atari ukuri ayabwira urwego rw'iperereza rw'imbere muri Amerika rwa FBI.

Bivugwa ko Bwana Abouammo yavuye ku kazi ke nk'ushinzwe umubano wa Twitter n'ibigo by'itangazamakuru mu mwaka wa 2015.

Ali Alzabarah na Ahmed Almutairi bombi bivugwa ko bari muri Arabie Saoudite.

Bwana Alzabarah, wahoze ari injeniyeri ('ingénieur') muri Twitter, ashinjwa kugera ku makuru y'abantu barenga 6,000 bakoresha Twitter mu mwaka wa 2015.

Icyo gihe yari amaze guhabwa akazi na ba maneko ba Arabie Saoudite.

Yahise abibazwaho n'abamukuriye mu kazi ndetse aba ahawe ikiruhuko mbere yuko ahungira muri Arabie Saoudite n'umugore we n'umukobwa we, nkuko abakora iperereza babivuze.

Inshuti ikomeye y'Amerika

Mu itangazo ubuyobozi bwa Twitter bwasohoye, bwavuze ko bwabonye "urwego abagizi ba nabi bazageraho" mu kugerageza kubangamira ibikorwa bya Twitter.

Iryo tangazo ryongeraho riti: "Turumva ibyago bikomeye abakoresha Twitter bahura nabyo bivuye ku gusangiza ibitekerezo byabo abandi ku isi no kubaza abari ku butegetsi igihe hari ibyo batubahirije".

"Dufite ibikoresho byo kurinda amakuru y'ubuzima bwite n'ubushobozi bwabo bwo gukora akazi kabo k'ingenzi".

Arabie Saoudite ni inshuti ikomeye y'Amerika mu karere k'uburasirazuba bwo hagati.

Perezida Donald Trump yakomeje umubano wa hafi n'ubwami bwa Arabie Saoudite nubwo bwanenzwe n'amahanga nyuma yaho umunyamakuru Jamal Khashoggi yiciwe mu mwaka ushize.

Bwana Khashoggi yishwe ubwo yari yagiye muri ambasade y'igihugu cye iri mu mujyi wa Istanbul muri Turukiya.