DR Congo: Inyeshyamba za ADF zirashinjwa kwica abaturage 50 mu minsi 7

Ingabo za DR Congo, FARDC Uwufise ububasha kw’isanamu FARDC
Image caption Ingabo za DR Congo, FARDC, zikambitse mu gace ka Beni aho ziri mu mirwano n'inyeshyamba za ADF

Mu gihe ingabo za leta ya DR Congo zikomeje kugaba ibitero byo kurandura umutwe wa ADF ukorera mu karere ka Beni mu burasirazuba bwa Congo, abarwanyi b'uyu mutwe nabo biraye mu baturage barica nk'uko abategetsi babivuga.

Paul Mohindo umudepite mu nteko ya Congo uhagarariye aka agace yatangaje ko ubu babarura abantu 50 bishwe n'abarwanyi ba ADF mu minsi irindwi ishize.

Bwana Mohindo asaba ingabo gukora ibishoboka zikarengera abaturage nk'uko bitangazwa na Radio Okapi iterwa inkunga n'umuryango w'abibumbye.

'Société civile' mu karere ka Beni ivuga ko hamaze kubarwa abantu 54 bishwe mu minsi irindwi ishize.

Ejo kuwa mbere mu gitondo abaturage batandatu bishwe na ADF muri commune ya Oicha iri mu cyaro mu karere ka Beni mu ntara ya Kivu ya ruguru nk'uko byatangajwa na 'Société civile'.

Ingabo za Leta zimaze ibyumweru ziri mu mirwano n'abo mu mutwe wa ADF muri aka karere, zivuga ko aba barwanyi bari gukora ubwicanyi nko kwihora no kubangisha ingabo.

Igisirikare cyanditse ku rubuga rwa Twitter ko: "[ibi] ari uburyo bushaje bw'umwanzi, buri gihe iyo asumbirijwe agaba ibitero byo kwihora ku baturage kugira ngo yanduze isura y'ingabo kandi ntibazifashe".

Igisirikare cya DR Congo kivuga ko ibi bitazagica intege ahubwo kigiye gushyira imbaraga mu kurinda ahantu hose izo nyeshyamba ziri kugera zikica abantu.

Inyeshyamba za ADF zirwanya ubutegetsi bwa Uganda zimaze imyaka irenga 20 zikorera muri ako gace gahana imbibi na Uganda.

Ingabo za DR Congo ziri mu bitero bigamije kurandura imitwe yitwaje intwaro ikorera mu burasirazuba bwa DR Congo, zikaba zarahereye ku mutwe wa ADF mu gikorwa bise 'Sukola 1 Grand-Nord'.

Mu gitero cyagabwe ku batura n'izo nyeshyamba ejo kuwa mbere hakicwa batandatu, hakomerekejwe batanu hanatwikwa inzu esheshatu z'abaturage nk'uko bivugwa na société civile ya Beni.