Ibitekerezo ku biganiro bibiri twabagejejeho ku mirwano i Minembwe
Ntibishobora gukina mu cuma cawe

Ibitekerezo ku biganiro bibiri twabagejejeho ku mirwano i Minembwe muri DR Congo (igice cya mbere)

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki 23 z'ukwa 11 mu 2019.

Uyu munsi turawuharira abatanze ibitekerezo ku biganiro bibiri twabagejejeho ku matariki ya 2 n'iya 9 z'uku kwezi kwa 11, ibiganiro byavugaga ku mirwano ibera mu karere ka Minembwe mu ntara ya Kivu y'epfo muri Repubulika ya Demokarasi ya Congo.

Ako karere kamaze amezi arenga 6 kugarijwe n'intambara bivugwa ko zirwanwa n'imitwe y'aba Mai Mai, itera imihana irimo abanyamulenge, ikica, igatwika amazu, ikananyaga inka zabo. Ubuyobozi bwa Minembwe buvuga ko hafi 80% by'imihana yaho mu Minembwe byatwitswe kuburyo abaturage baho bahungiye muri centre ya Minembwe. Buvuga ko abarenga ibihumbi 100 bahunze. Abo bategetsi b'i Minembwe, bavuga ko iyo mitwe y'aba Mai Mai, bavuga ko igizwe n'amoko y'abafurero, ababembe, n' abanyendu. Hakaba kandi n'imitwe y'abanyamulenge bita Twirwaneho hamwe na Gumino. Hari ndetse n'imitwe y'abanyamahanga ivugwamo nka Red Itabara na FNL y'Abarundi. Abanyamulenge ndetse n'abo bayobozi b'i Minembwe bashyira mu majwi ingabo za Congo, FARDC, ko zireberera iyo iyo mitwe y'aba Mai Mai ije kubatera. Leta ya Kinshasa ariko ivuga ko yakoze ibyo ishoboye, yohereza abasirikare muri ako karere kujya kugarura umutekano, ariko isanga ibibazo biri hagati y'ayo moko aturanye. Igisirikare cya Congo kivuga ko gihagarara hagati y'ayo moko kikirinda gufata uruhande runaka. Muri ibyo biganiro twari kumwe n'umushingamateka Moïse Nyarugabo, watowe muri ako karere akaba anakomoka no mu bwoko by'abanyamulenge, Gad Mukiza, umuyobozi w'akarere ka Minembwe, Pierro Kaluba, umuyobozi w'abanyendu hamwe rero na Nyamuombeza Ombe, Umunyecongo ukomoka i Bukavu ariko uba muri Finland.

Nyuma y'ibyo biganiro abantu benshi baratwandikiye bifuza ko tubahuza na Moïse Nyarugabo, abandi bifuza ko tubahuza na Nyamuombeza Ombe. Twarabatumikiye, tubabajije bombi bemera kuza muri iki kiganiro. Ubu rero umwanya n'uw'abatwandikiye bifuza gusobanuza ibyo abo batumire bacu bavuze muri ibyo biganiro.

Iki kiganiro mwagiteguriwe kandi murakigezwaho na Félin Gakwaya.