London Bridge: Jack Merritt na Saskia Jones biciwe mu gitero baribukwa none

Jack Merritt (ibumoso) yari umuhuzabikorwa ya gahunda yo kwigira hamwe ya Kaminuza ya Cambridge, naho Saskia Jones (iburyo) yari umukorerabushake muri iyo gahunda Uwufise ububasha kw’isanamu MET POLICE
Image caption Jack Merritt (ibumoso) yari umuhuzabikorwa ya gahunda yo kwigira hamwe ya Kaminuza ya Cambridge, naho Saskia Jones (iburyo) yari umukorerabushake muri iyo gahunda

Umuyobozi w'umujyi wa London mu Bwongereza ni umwe mu bitezwe ko baza kwitabira umuhango wo kwibuka abiciwe mu gitero cy'ahitwa London Bridge mu murwa mukuru w'Ubwongereza.

Jack Merritt w'imyaka 25 y'amavuko na Saskia Jones w'imyaka 23, baraza kwibukwa mu muhango ubera ku nyubako ya Guildhall Yard iri i London.

Uwo muhango uribukirwamo kandi abakomeretse, inzego z'ubutazi bwihuse n'abaturage bihutiye gutabara.

Bibaye nyuma yaho hasabwe ko mu buryo bwihutirwa hongera kugenzurwa ibijyanye n'uruhushya rwo gufungura abahamwe n'ibyaha by'iterabwoba.

Igitabo cyo kwandikamo amagambo yo kwihanganisha kiraza gufungurwa muri iyo nyubako mu gice cyahariwe imurikwa, ndetse rubanda ruze gushyira indabo hanze hafi y'iyo nzu.

Uwo muhango uratangira ku isaha ya saa tanu ku isaha ngengamasaha ya GMT - ni ukuvuga i saa saba ku isaha yo mu Rwanda no mu Burundi.

Uwufise ububasha kw’isanamu WEST MIDLANDS POLICE
Image caption Usman Khan w'imyaka 28 ni we wagabye icyo gitero

Birabera mu ntera igera kuri kilometero imwe uvuye ku nyubako ya Fishmongers' Hall, aho Usman Khan w'imyaka 28 wari warahamwe n'ibyaha by'iterabwoba, yagabiye icyo gitero ku wa gatanu.

Khan, warekuwe mu kwezi kwa cumi na kabiri mu mwaka wa 2018 nyuma yo kumara kimwe cya kabiri cy'igifungo muri gereza, nyuma yaje kwicwa arashwe na polisi aho kuri London Bridge.

Boris Johnson, Minisitiri w'intebe w'Ubwongereza, ejo ku cyumweru yavuze ko abantu 74 bafunzwe kubera ibyaha by'iterabwoba bakaza gufungurwa mbere yo kurangiza igifungo, uruhushya rubafungura rugiye kongera gusuzumwa.

Nyuma yaho ejo ku cyumweru, polisi ikorera ahitwa Staffordshire naho ho mu Bwongereza yatangaje ko umugabo w'imyaka 34 yatawe muri yombi acyekwaho gutegura ibikorwa by'iterabwoba.

Ariko iyo polisi yongeyeho ko nta makuru ahari agaragaza ko uwo mugabo yagize uruhare mu gitero cya London Bridge.

Bwana Merritt na Madamazela Jones bombi bize kuri Kaminuza ya Cambridge yo mu Bwongereza. Ubwo bicwaga bari bitabiriye igikorwa cya gahunda y'iyo kaminuza ijyanye no kwigira hamwe.

Iyo gahunda yibanda ku gufasha gusubira mu buzima busanzwe abahoze bafunze.

Ibindi bisa n’ibi