Leonardo DiCaprio arashinjwa 'gutanga amafaranga yo gutwika ishyamba rya Amazon'

Imiriro yatwitse ibice by'iryo shyamba mu kwezi kwa munani yatumye ku isi haba guhangayikira iri shyamba rifatwa nk'"ibihaha by'umubumbe" w'isi Uwufise ububasha kw’isanamu AFP
Image caption Imiriro yatwitse ibice by'iryo shyamba mu kwezi kwa munani yatumye ku isi haba guhangayikira iri shyamba rifatwa nk'"ibihaha by'umubumbe" w'isi

Perezida Jair Bolsonaro wa Brazil ashinja Leonardo DiCaprio, umukinnyi wa filime z'i Hollywood muri Amerika, "gutanga amafaranga yo gutwika ishyamba rya Amazon".

Bwana Bolsonaro nta gihamya yatanze y'ibyo avuga.

Ariko mu gihe cyashize yashinje imiryango itegamiye kuri leta inenga gahunda z'ubutegetsi bwe kuba ari yo yatangije imiriro yashegeshe iryo shyamba ry'inzitane uyu mwaka.

Abantu benshi bamaze gutabwa muri yombi, mu gihe hakomeje kuvugwa ibirego bitavugwaho rumwe kandi bidafite gihamya by'uko iyo miriro yakijwe hagamijwe kubona imfashanyo.

DiCaprio, wasezeranyije gutanga imfashanyo ya miliyoni eshanu z'amadolari y'Amerika agenewe Amazon, yahakanye ibyo bivugwa na Bwana Bolsonaro.

Ibyo birego bishya bigaragara nk'ibyaturutse ku itabwa muri yombi ry'abazimya inkongi b'abakorerabushake bo muri leta ya Pará mu majyaruguru y'igihugu.

Baregwa kuba ari bo batangije iyo nkongi ngo babone inkunga z'imiryango itegamiye kuri leta.

Imiryango iharanira uburenganzira bwa muntu, imiryango itegamiye kuri leta ndetse n'abanenga leta ya Brazil, bavuga ko igikorwa cya polisi kibibasira gishingiye ku mpamvu za politiki.

Uwufise ububasha kw’isanamu PA
Image caption Leonardo DiCaprio yahakanye ibyo yavuzweho na Perezida wa Brazil

Bavuga kandi ko ari ukugerageza kwibasira imiryango irengera ibidukikije.

Imiriro yatwitse ibice by'iryo shyamba mu kwezi kwa munani yatumye ku isi haba guhangayikira iryo shyamba rifatwa nk'"ibihaha by'umubumbe" w'isi.

Perezida yavuze iki?

Icyo kirego gishya yakivugiye mu magambo macye ku wa gatanu yavugiye mu nyubako abamo ya perezida.

Ati: "Uyu [witwa] Leonardo DiCaprio ni umuntu mwiza, si byo? Utanga amafaranga yo gutwika Amazon".

Nta gihamya yatanze kandi nta bindi birenzeho yavuze, nubwo ayo magambo ye asa nk'ayunga mu byo yavugiye ku rubuga rwa internet mu buryo bwa 'webcast' ku munsi wabanje wo ku wa kane.

Kuri uwo kane yagarutse ku muryango urengera ibidukikije witwa World Wildlife Fund (WWF) n'ibirego, wahakanye, ko warishye amafoto yafashwe n'abazimya inkongi batawe muri yombi, kuri ubu bamaze kurekurwa.

Uwufise ububasha kw’isanamu AFP
Image caption Bwana Bolsonaro avuga ko Amazon yatwitswe n'abashaka gusebya ubutegetsi bwe

Bwana Bolsonaro yagize ati: "Rero uwo muryango utegamiye kuri leta wabigenje gute? Ni iki cyoroshye cyane gukora? Gutwika ishyamba. Gufata amafoto, gukora videwo".

"WWF ikora ubukangurambaga burwanya Brazil, ihamagara Leonardo DiCaprio, ayiha imfashanyo y'amadolari 50,000".

Yongeyeho ati: "Igice kimwe cyayo cyahawe abantu bari barimo gukongeza iyo miriro. Leonardo DiCaprio, urimo gutera inkunga umuriro wo muri Amazon, [kandi] ibyo ntacyo bizamara".

DiCaprio yasubije iki?

Uyu mukinnyi wa za filime akaba n'impirimbanyi yo kurengera ibidukikije, yasohoye itangazo agira ati:

"Nubwo mu by'ukuri ikwiye gufashwa, ntabwo twateye inkunga imiryango kuri ubu iri kwibasirwa".

"Ejo hazaza h'izi nsobe z'ibinyabuzima ndasimburwa hari mu kaga kandi ntewe ishema no kuba mu matsinda azirinda".

Uwufise ububasha kw’isanamu Reuters
Image caption DiCaprio yahakanye ibyo ashinjwa ariko avuga ko ashyigikiye imiryango ikora mu bijyanye no kurengera ishyamba rya Amazon

Yashimagije "abaturage ba Brazil bari gukora ngo barengere umurage wabo karemano kandi ushingiye ku muco".

Umuryango WWF na wo wavuze ko nta mfashanyo wigeze uhabwa n'uwo mukinnyi wa za filime, unafite ikigo Leonardo DiCaprio Foundation kibanda ku mishinga yo kurengera ibidukikije.

Icyo kirego cya Bwana Bolsonaro cyasuzuguwe n'abatavuga rumwe na we.

Senateri Randolfe Rodrigues yatangaje ubutumwa ku rubuga rwa Twitter ati: "Mbega kwanduranya.

"Perezida wacu utagira icyo yitaho kandi udashoboye, wagize uruhare mu kwangiza ibidukikije kutari kwarigeze kubaho mbere, ari kubyegeka kuri DiCaprio, aho kuba ubutegetsi bwe bwite budashobora gutera n'intambwe imwe butagize icyo busenya".

Iyo miriro iteye ite kandi ni nde nyirabayazana?

Mu gihe cy'ibyumweru byinshi mu kwezi kwa munani, imiriro yatwitse ibice bimwe by'ishyamba rya Amazon ku kigero kitari cyarigeze kibonwa mu myaka ishize, bituma amahanga ahangayikira iryo shyamba rifatwa nk'"ibihaha by'isi".

Amazon ni ryo shyamba ry'inzitane rya mbere mu bunini ku isi, rikaba n'ikigega cy'ingenzi cy'umwuka wa 'carbon' ugabanya ikigero cy'ubushyuhe bw'isi.

Muri uko kwezi kwa munani, habaye imiririo ibarirwa mu bihumbi yatangijwe n'abantu ku giti cyabo, iruta hafi inshuro eshatu imiririo 30,901 yakongejwe mu kwezi nk'uko ko mu mwaka ushize.

Bwana Bolsonaro yagabye ingabo mu ishyamba rya Amazon, nuko imiriro igenza macye nyuma y'uko kwezi kwa munani, nubwo impirimbanyi zivuga ko leta yagakwiye kuba iri gukora ibiruseho ngo iyihagarike.

Imiriro y'ishyamba iba mu gihe cy'impeshyi (cyangwa icyi), hagati y'ukwezi kwa karindwi n'ukwa cumi. Ishobora guterwa n'ibintu bibaho mu buryo karemano, nk'ikubita ry'inkuba.

Ariko uyu mwaka, myinshi muri yo byibazwa ko yatangijwe n'abahinzi n'abatema ibiti ngo babone ubutaka bwo guhingamo imyaka cyangwa ngo babone ubwatsi bwo kuragiramo.