Tanzania ntishaka ko hari uzabasha kuyirega guhonyora uburenganzira bwa muntu

Perezida John Magufuli ari ku butegetsi kuva mu 2015 Uwufise ububasha kw’isanamu Getty Images
Image caption Perezida John Magufuli ari ku butegetsi kuva mu 2015

Tanzania irashaka kuva ku kwemera ingingo y'urukiko nyafurika rw'uburenganzirwa bwa muntu ituma hari ushobora kuyirega guhonyora ubwo burenganzira, umuryango mpuzamahanga uharanira uburenganzira bwa muntu uvuga ibi bizongera ikandamiza mu gihugu.

Urwo rukiko nyafurika rw'uburenganzira bwa muntu (AfCHPR) rufite icyicaro i Arusha mu majyaruguru ya Tanzania.

Japhet Biegon, umuhuzabikorwa ushinzwe ubuvugizi muri Afurika mu muryango Amnesty International, yavuze ko "bizima amahirwe abantu n'imiryango muri Tanzania ku hantu h'ingenzi ho kubonera ubutabera, mu gihugu gifite urwego rw'ubucamanza rujegajega cyane".

"Iki gikorwa urebye kibujije abantu n'imiryango itegamiye kuri leta ikorera mu gihugu kuba bajya mu rukiko mu buryo butaziguye basaba kurenganurwa ku bijyanye n'ihonyorwa ry'uburenganzira bwa muntu".

"Biragaragara neza ko ari igerageza ririmo kwikunda rigamije guhunga kuryozwa [ibikorwa by'ihonyorwa ry'uburenganzira bwa muntu]".

Kuva ku manza zijyanye n'ibibazo by'amasambu (ubutaka) kugera ku zijyanye n'igihano cy'urupfu, urwo rukiko - kuva rwashingwa mu 2004 - rwamye ari ubuhungiro ku batanyuzwe n'imanza baciriwe n'ubucamanza bwa Tanzania.

Ubu, uwo muryango banyuragamo batanga ibirego byabo urimo gufungwa.

Leta ya Tanzania yavuze ko irimo kwikura ku ngingo imwe y'urwo rukiko kuko rutateze amatwi impungenge zayo zijyanye no kwemerera abantu n'imiryango itegamiye kuri leta kuyirega.

Hafi 40% by'ibirego byagejejwe muri urwo rukiko ni ibirega leta ya Tanzania.

Ibihugu 52 by'Afurika byashyize umukono ku masezerano ashyiraho urwo rukiko.

Umuryango Amnesty International uvuga ko icyo gikorwa cya Tanzania ari cyo kimenyetso cya vuba aha cyo guhonyora uburenganzira bwa muntu n'ababuharanira bikomeje kwiyongera.

Wasabye icyo gihugu kwisubiraho ku cyemezo cyafashe cyo kuva kuri iyo ngingo y'uru rukiko irengera uburenganzira bwa muntu.