Umuntu wa mbere wishwe na coronavirus i Burayi yatangajwe mu Bufaransa

Ubufaransa busanzwe bwaremeje ko bufite abantu 11 barwaye ubu bwoko bushya bwa coronavirus Uwufise ububasha kw’isanamu Getty Images
Image caption Ubufaransa busanzwe bwaremeje ko bufite abantu 11 barwaye ubu bwoko bushya bwa coronavirus

Mukerarugendo w'Umushinwa yapfiriye mu Bufaransa nyuma yo kwandura ubwoko bushya bwa coronavirus - uyu akaba ari we wa mbere yishe hanze y'umugabane w'Aziya.

Uwo mugabo w'imyaka 80 yakomokaga mu ntara ya Hubei mu Bushinwa, nkuko byavuzwe na Agnès Buzyn, Minisitiri w'ubuzima w'Ubufaransa.

Yapfuye azize kwangirika kw'ibihaha kwaturutse kuri coronavirus.

Yageze mu Bufaransa ku itariki ya 16 y'ukwezi kwa mbere, ku itariki ya 25 y'uko kwezi ashyirwa mu kato mu bitaro bya Bichat biri mu majyaruguru y'umurwa mukuru Paris, nkuko Madamu Buzyn yabivuze.

Impfu eshatu gusa ni zo zari zaratangajwe mbere zo hanze y'Ubushinwa - muri Hong Kong, Philippines no mu Buyapani.

Ariko abantu barenga 1,500 bamaze kwicwa na coronavirus mu Bushinwa, benshi muri bo i Hubei aho yagaragaye bwa mbere.

Abandi bantu 2,641 bemejwe ko bayanduye, ubu umubare w'abamaze kuyandura mu Bushinwa bose hamwe bakaba ari 66,492.

Mu mpera y'ukwezi kwa mbere, Ubufaransa bwabaye igihugu cya mbere i Burayi cyemeje ko hari abantu cyasanganye coronavirus.

Bufite abantu 11 byemejwe ko barwaye ubu bwoko bushya bwa coronavirus - buzwi ku izina rya Covid-19, kandi batandatu baracyari mu bitaro.

Madamu Buzyn yavuze ko mushiki w'uwo mugabo wapfuye ari umwe muri abo bayanduye, ariko byemezwa ko arimo koroherwa.

Hanze y'Ubushinwa, hamaze kugaragara abantu barenga 500 bo mu bihugu 24 banduye coronavirus.

Ibindi bisa n’ibi