Coronavirus: Koreya y'Epfo yakajije ingamba kubera kwiyongera k'umubare mushya w'abanduye

Umubare w'abemejwe ko banduye coronavirus muri Koreya y'Epfo wariyongereye cyane mu minsi ibiri ishize Uwufise ububasha kw’isanamu Reuters
Image caption Umubare w'abemejwe ko banduye coronavirus muri Koreya y'Epfo wariyongereye cyane mu minsi ibiri ishize

Koreya y'Epfo yakajije ingamba zo kubuza ikwirakwira ry'ubwoko bushya bwa coronavirus, mu gihe umubare w'abemejwe bashya bayanduye wiyongereye cyane ku munsi ugira kabiri.

Minisitiri w'intebe Chung Sye-kyun yavuze ko ibyo igihugu kiri kubifata nk'"ibihe bidasanzwe".

Imijyi ibiri yo mu majyepfo - Daegu na Cheongdo - yagizwe ahantu ho "gutanga ubufasha bw'umwihariko".

Iki gihugu kandi cyabaye nk'igihagarika ubuzima mu bya gisirikare nyuma yaho abasirikare benshi bapimwe bagasanganwa iyo virusi.

Kuri uyu wa gatanu, Koreya y'Epfo yemeje ko abantu 52 bashya banduye coronavirus nyuma y'abandi 53 bayisanzemo ejo ku wa kane.

Ubu iki gihugu gifite abantu bose hamwe 156 bayirwaye, bikaba byatumye kiba ahantu hanini handi hari abarwayi ba coronavirus hanze y'Ubushinwa ndetse havuyemo n'abo mu bwato Princess Diamond mu Buyapani.

Ejo ku wa kane, abategetsi bemeje ko umuntu wa mbere muri iki gihugu yapfuye azize coronavirus, mu mujyi bihana imbibi wa Cheongdo.

Uwo mugabo yari amaze igihe kinini arwariye mu kigo kivura abafite uburwayi bwo mu mutwe, ahabonetse n'abandi barwayi 14 basanganwe coronavirus.

Ni izihe ngamba zafashwe?

Imijyi yombi ya Daegu na Cheongdo yagizwe ahantu ho "gutanga ubufasha bw'umwihariko" ndetse leta yasezeranyije gufata ingamba zihuse mu kurinda ko iyo virusi ikomeza gukwirakwira.

Ibiro ntaramakuru Yonhap bisubiramo amagambo ya Minisitiri w'intebe Chung agira ati: "Ni ibintu byihutirwa gutahura abantu bagize aho bahurira n'abantu banduye no kuvura abarwayi".

Yavuze ko leta iri gutanga ibitanda by'abarwayi, ibikoresho byo kwa muganga n'abaganga ndetse aburira ko ubu iyo virusi iri kugenda icengera mu bindi bice.

Ibindi bisa n’ibi