Coronavirus: Gukwirakwira kwihuse kwateje ubwoba ko ishobora kugera ku rwego rw'icyorezo

Koreya y'Epfo ni yo ifite umubare munini w'abanduye coronavirus bo hanze y'Ubushinwa Uwufise ububasha kw’isanamu AFP
Image caption Koreya y'Epfo ni yo ifite umubare munini w'abanduye coronavirus bo hanze y'Ubushinwa

Ubwoba buri kwiyongera ko coronavirus ishobora kugera ku rwego rw'icyorezo mu gihe hakomeje kugaragara abandi bantu mu bice bitandukanye by'isi bayirwaye.

Benshi mu bayanduye ni abo mu Bushinwa, ariko ibindi bihugu nka Koreya y'Epfo, Ubutaliyani na Iran bihanganye n'ubwo bwoko bushya bw'iyo virusi itera indwara yo mu myanya y'ubuhumekero yitwa Covid-19.

Bivugwa ko indwara yabaye icyorezo iyo yandura ikwirakwiriye mu buryo bworoshye iva ku muntu umwe ijya ku wundi mu bice byinshi by'isi.

Abantu hafi 77,000 bo mu Bushinwa, aho iyo virusi yagaragaye mu mwaka ushize, bamaze kuyandura ndetse abandi hafi 2,600 imaze kubica.

Abantu barenga 1,200 bamaze kwemezwa ko bayanduye mu bindi bihugu hafi 30 naho abantu barenga 20 imaze kubahitana. Kuri uyu wa mbere, Ubutaliyani bwatangaje ko abandi bantu babiri yabishe, bituma umubare w'abo imaze kwica muri iki gihugu ugera kuri batanu.

Ikigero cy'abarwayi bayirwaye bari gupfa kubera iyo ndwara izwi nka Covid-19 kigaragara nk'ikiri hagati ya 1% na 2%, nubwo ishami ry'umuryango w'abimbumbye ryita ku buzima (OMS/WHO) riburira ko ikigero cy'abo yica kitaramenyekana.

Kuri uyu wa mbere, Iraq, Afghanistan, Kuwait na Bahrain byatangaje abantu ba mbere byemeje ko bayirwaye, bose bahageze bavuye muri Iran.

Tedros Adhanom Ghebreyesus, umukuru wa OMS, yari yaburiye ko igihe cy'amahirwe yo guhagarika coronavirus "kiri kugabanuka".

Uwufise ububasha kw’isanamu Reuters
Image caption Mu mujyi wa Milan mu karere ka Lombardie mu majyaruguru y'Ubutaliyani, ibikorwa bihuriramo abantu benshi byahagaritswe kubera coronavirus

Paul Hunter, wigisha kwirinda mu bijyanye n'ubuzima bw'abantu kuri Kaminuza ya East Anglia mu Bwongereza, yunze mu ry'umukuru wa OMS, avuga ko kwiyongera kw'abarwayi ba coronavirus mu Bushinwa "biteye impungenge zikomeye".

Kuri uyu wa mbere, Bwana Hunter yagize ati: "Igihe aho nyuma yacyo nta garuriro mu bushobozi bwacu bwo kurinda ko iba icyorezo ku isi, gisa nkaho cyarushijeho kutwegera nyuma y'amasaha 24 ashize".

Margaret Harris, umuvugizi wa OMS, yabwiye BBC ko uko ibintu bimeze ubu bitari kubonwa nk'icyorezo kuko ibihugu bigishobora kurinda ko iyo virusi ikwirakwira byihuse cyane.

Ati: "Iyo ibihugu biramuka nta ngamba na busa byafashe, twari kuba twarabonye abantu benshi cyane kurushaho bayanduye. Icyo ni cyo tuba dushatse kuvuga iyo tuvuze guhagarika".